Angut 77.000 koruuninik pinilik tigusarineqarpoq
Angut 44-nik ukiulik Nanortallip Heliportianit marlunngormat aallariartulersoq politiinit tigusarineqarpoq. Angutip kamiisa iluini aningaasat pinigineqartut 77.000 koruunit politiinit nassaarineqarput.
Allattoq Oline I. Olsen
novembarip 02-at 2009 08:32
Angut ikiaroornartumik eqqussisimasutut pasineqarluni siullermik tigusarineqarpoq. Angutip aningaasat 77.000 koruunit kamiminut toqqortarigai politiit misissuineranni paasineqarpoq.
Angut Kalaallit Nunaannut ikiaroornartumik eqqussisimasutut pineqaatissinneqareernikuuvoq misiligummillu januuarimi iperagaalluni.
- Angut Danmarkimi najugaqarpoq Nanortalimmullu ikiaroornartumik eqqussilluni tuniniaareersoq tigusarivarput, politeeqarfimmi pisortaagallartoq Tino Pedersen oqarpoq.
Ikiaroornartup tuniniarneqartup annertussusaa politiinit suli ilisimaneqanngilaq. Angut tigusarineqartoq sapaatip akunneri sisamat tigummigallangaassaaq.
