Angut 71-inik ukiulik kalaallimik sakkutuumik apuisimasutut unnerluutigineqartoq

Kalaaleq 22-nik ukiulik Jyllandimi Karupip timmisartoqarfiata eqqaani biilimit aporneqarluni sapaatit akunnerata siuliani ataasinngormat toquvoq. Angut 71-inik ukiulik apuisimasutut pasineqarluni maanna unnerluutigineqarpoq.
Biilinik aquttoq apuinermi kingorna bilerluni qimaasimavoq. Herningip avannaannut Viborgip tungaannut ingerlaarsimalluni. videoliulu immiussaq iluaqutigalugu politiinit avammut saqqummiuppaat. Assi © : Midt- og Vestjyllands Politi
oktobarip 15-at 2019 06:39
Nutserisoq Bikki P. Kleist

Jyllandip qeqqani kitaanilu politiinit ippassaq ataasinngornermi angut 71-inik ukiulik ilaatigut mianersuaalliorluni toqutsisimasutut pasineqarluni tigusarineqarpoq.

Politiit taama nalunaaruteqarput.

Kalaaleq angut ajunaartoq, mittarfeqarfiup Karupip tungaanut aqqusinermi Herningvejimi pisuinnaat aqqutaatigut pisutsilluni biilimit aportilluni sapaatit akunnerata siuliani ataasinngornermi ajunaarpoq.

AAMMA ATUARUK Kalaaleq sakkutooq Danmarkimi aporneqarluni toqusoq

Angut uummassarneqarsimagaluarpoq annaanneqarsinnaasimananili.

22-nik ukiulik Aasiaat eqqaanneersuuvoq.

Biilertoq apuinermi kingorna bilerluni qimaasimavoq. Herningip avannaannut Viborgip tungaannut ingerlaarsimalluni. videomillu immiussaq iluaqutigalugu politiinit avammut saqqummiuppaat.

Politiit misissuinerminni immiussani allani nutaani biili pineqartup saneraatigut suliffeqarfiup ilisarnaataanik allassimasoqartoq takuneqarsinnaasimavoq kingornalu 71-inik ukiullip najugaqarfianiittoq politiinit paasineqarluni.

Biilinik apuisup angerlarsimaffiani biilip saavatigut igalaavatigullu ajoqusersimasoq paasineqarpoq, biililu pineqartoq politiit teknikkikkut misissuisartuinit misissorneqartussanngorpoq.

AAMMA ATUARUK Politiit sakkutuumut aporsisumut atatillugu paasissutissarpassuarnik tunineqartut

71-inik ukiulik ilaatigut pisuusutut nassuereersorlu aniguisinneqarpoq, apuisup ilaatigut nassuiaatigisimavaa ajutoornerup nalaani isumaqarsimalluni uumasut ilaat aporsimallugu.

Apuisoqarnera pillugu suliaq politiinit eqqartuussiveqarfimmiillu maanna suliarineqartussanngorpoq.

Apuisoqareersorlu politiit innuttaasunit saaffigineqarluarsimapput saaffiginnissuterpassuarnullu politiit qujassuteqarput.