Angut 52-inik ukiulik inuunermi sinnera anstalt-imiittussanngortinneqarpoq
Angut 52-inik ukiulik piffissaligaanngitsumik pinerluuteqarsimasunik inissiisarfimmiittussanngorlugu pineqaatissinneqarpoq.
Pinerluuteqarsimanermi suliaq siorna 2007-imi novemberip qaammataani aallartinneqarpoq, ullullu marluk Aasiaat eqqartuussiviani eqqartuussineq ingerlanneqareersorlu ippassaq pineqaatissiineq aalajangiunneqarpoq.
Eqqartuussinermi unioqqutitsinerit 28-it suliarineqarput.
Suliap ingerlanneqarnerani uppernarsaasut amerlasuut killisiorneqarput Pineqaatissinneqartoq eqqarsartaatsimigut misissorneqarpoq piffissami sivisuumi.
Angutip eqqarsartaatsimigut misissorneqarnerata kingorna misissuinermi inernerit pappialartaat sivisuumik utaqqineqarput, Aasianni politeeqarfiup pisortaa Aqqaluk Petersen oqarpoq.
Angutip 52-inik ukiullip pineqaatissinneqartup inuunermi sinnerani pinerluuteqarsimasunut inissiisarfimmiittussanngortinneqarnissaa ajunnginnerussasoq pingaartissimavara, eqqartuussinermi illersuisuusoq Magnus Therkildsen oqarpoq, taamaattumillu eqqartuussinermi pineqatissiineq iluarisimaarpara Magnus Therkildsen oqarpoq.
