Angut 47-nik ukiulik Ilulissani unatarneqarujussuarsimavoq
Angut inimini unatarneqartoq baajanillu karsinik tilliffigitittoq pillugu Ilulissani politiit tallimanngormat unnukkut kalerrinneqarput.
- Politiit takkukkamik takusinnaavaat angut inissiami ineqartoq kiinnamigut timimigullu annertuumik annersarneqarsimasoq. Angutit inuusuttut marluk angutip inaanut parnaaqqanngitsumut isersimapput, angullu unatarlugu aallartissimallugu, kingornalu baajaataanik karsimik tilliffigalugu, Ilulissani politeeqarfimmi pisortaq Janus Eigaard Sermitsiamit apersorneqarluni taama oqaluttuarpoq.
Inuusuttut taakku marluk tallimanngormat unnukkut kingusinnerusukkut tigusarineqarput, inatsisillu tunngaviusut naapertorlugit killisiorneqareerlutik ulluni qulini arfininngormat ualikkut tigummigallagassanngortinneqarlutik.
Taakku sakkortuumik persuttaasimasutut tillinniarsimasutullu maanna unnerluutigineqartussanngorput. Angut tillinniarfigitittoq sakkortuumik persuttarneqartoq ajoquserneqarnini pillugit napparsimmavimmut unitsinneqarpoq.
