Angut 46-nik ukiulik toqutseriarsimasutut ukiunik sisamik pineqaatissinneqarsimasunut inissiisarfimmiittussanngortinneqartoq

Tasiilami angut 46-nik ukiulik inooqatigisimasaminut toqutseriarsimasutut Nunatta Eqqartuussiviani februaarip 14-ianni suliaq ingerlanneqarpoq.

Nunatta Eqqartuussiviata aalajangersugaanik ukiunik sisamanik pineqaatissinneqarsimasunut inissiisarfimmiittussanngortinneqarnissaa Eqqartuussisoqarfik Sermersuumi aalajangersarneqarpoq.

Kalaallit Nunaanni politiit tusagassiuutinut nalunaarummi allapput.

Suliaq angummut inooqatigisimasaminut februaarip aqqaneq aappaanni festerfimmiitillutik kamaannerannut tunngassuteqarpoq. Angutip arnaq nivaatamik niaquatigut arlaleriarluni anaalerpaa, ilisimajunnaaqqasorlu silami qiianaqisumi qimaannarlugu.

Qulinik issittoq qimaannarsimagaa
Arnaq annakkaluartoq angutip peqqarniitsumik toqutseriarsimanera peqqutigalugu taama eqqartuussivimmi eqqartuunneqarpoq.

46-nik ukiulik eqqartuussummut isumaqataanani pinngitsuutitaanissaminut nunatta eqqartuussiveqarfianut suliassanngortitseqqiivoq.

Nunattali eqqartuussiviata eqqartuussivimmitulli toqutseriarsimasutut nalilerpaa.

- Nunatta Eqqartuussiaviata eqqartussivimmitut aalajangernera iluarisimaarpaara. Unnerluussisussaatitaasut suliap ingerlanera tamaat angutip peqqarniitsututu ulorianartutullu nalilerpaat. Unnerluunneqartup arnap taamatut qimaannarneqarnini toqqutigisinnaaneranik kinguneqarsinnaasoq paasisimasariaqarpaa, Kalaallit Nunaanni politiiniit unnerluussisoq, Mathilde Theilade Nyland tusagassiuutinut nalunaarummi oqarpoq.

Nunatta Eqqartuussiviata, angut peqqarniitsutut arnallu inuuneranut ulorianartorsiortitsisimammat, arnallu ilisimajunnaaqqasoq qulinik issittumi qimaannarlugu iliuuseqasimanera aalajangiinerannut peqqutaavoq. Nunatta Eqqartuussivia naapertorlugu arnap inuunermini ulorianartorsiornera, angutip 46-nik ukiullip paasisimasariaqarpaa.

Angut pisup nalaani tigusarineqaramili tigummigallarneqarpoq taamaammat taanna pineqaatissinneqarsimasunut inissiisarfimmiitinneqalereernikuuvoq.