Angut 57-inik ukiulimmik angummik januaarip 21-ani nal. 17:30 toqutsisimasutut pasineqartoq eqqartuussivimmi unnerluunneqassaaq.

Angut 38-nik ukiulik Niaqornaneersoq toqutsisutut unnerluunneqassaaq

Angutip angut alla Niaqornani januaarimi niuatigut aallaavaa. Suliaq qaammatip tulliani eqqartuussivimmi suliarineqassaaq.

Angut 38-inik ukiulik oktobarip naalernerani eqqartuussaassaaq. 

Taanna januaarimiit maannanut suli tigummigallarneqartoq unnerluussisussaatitaasut KNR-imut paasissutissiipput.

Pasineqartoq januaarip 21-ani nalunaaqutaq 17:30 angummik 57-inik ukiulimmik Niaqornani toqutsisimasututut unnerluunneqassaaq.

Unnerluussutit naapertorlugit angutip 38-inik ukiullip 57-inik ukiulik niuatigut talerperlikkut aallaammik kaliber 22-250--imik aallaavaa. 57-inik ukiullip aallaaneqarnini toqqutigaa. 

Pisup kinguninngua 38-inik ukiulik aamma Niaqornaneersuusoq tigusarineqarpoq maannamullu suli tigummigallagaalluni.

AAMMA ATUARUK Niaqornani toqutsinermik suliaq: Angut ulluni 26-ni tigummigallarneqassaaq

Pinerluttulerinermut inatsisini paragraf 86 stk.1 naapertorlugu angut 38-nik ukiulik eqqartuunneqartussanngorpoq. 

Eqqartuussinermi tamanna uppersineqassanngippat unnerluussisussaatitaasut 38-inik ukiullip mianersuaalliorluni toqutsisutut eqqartuunneqarnissaa anguniarpaat.  

Suliaq Eqqartuussisoqarfik Qaasuitsumi oktobarip 24-ani 25-ani 26-anilu suliarineqassaaq.

Nunatsinni politiit pinerluttoqarsimaneranik misissuisartunik toqusullu timaanik misissuisartumik Rigspolitiineersunik tikisitsinerisa kingorna, misissuinerit aallaavigalugit toqutsisutut pasisamik unnerluussisoqassaaq.

Toqutsinerit arfinillit

Ukioq manna ulloq manna tikillugu toqutsinerit arfiniliuppugut. Agguaqatigiissullugu ukiumut inuit tallimat toqutaasarput.

Ukioq manna toqutsinerni siulleq ukioq manna ullormi siullerpaami pivoq. Taamani 18-inik ukiullip ataatani 42-inik ukiulik Tunumi Sermiligaami peqqarniitsumik nakuuserfigalugu toquppaa. Erniusoq tamanna pillugu pineqaatissinneqarluni eqqartuunneqarpoq.

Ullualuit qaangiuttoq angut 48-inik ukiulik Tasiilami inissiami toqungasoq nassaarineqarpoq, arnarlu 41-nik ukiulik pasineqarluni tigusarineqarpoq.

Angut 57-inik ukiulik Niaqornani qoorortuumik aallaaneqarluni januaarimi toqutaavoq, tassani tigusarinnittoqarlunilu toqutsisutut pasinnittoqarpoq.

Arnaq 56-inik ukiulik Sisimiuni toqungasoq marsimi nassaarineqarpoq, angut inuusunnerusoq pasineqarlunilu tigummigallarneqarpoq.

Tasiilami apriilip ulluisa 26-anni allamik aamma toqutsisoqarpoq. Tassani 30-nik ukiulik toqutaavoq. Angummi tassani tigusarinnittoqarlunilu tigummigallaasoqarpoq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl