Angut 37-nik ukiulik 10 gramimik amfetaminimik eqqusseriaraluartoq
Politiit tallimanngormat ullup qeqqalernerani Aasianni mittarfimmi angut 37-nik ukiulik ikiaroornartumik amfetaminimik 10 gramimik annertussusilimmik eqqusseriaraluartoq tigusarivaat.
Allattoq Oline I. Olsen
septembarip 10-at 2007 10:51
-Angut amfetaminimik eqqusseriaraluartoq, siornatigut ikiaroornartulerisimasutut ukiut marluk pinerluuteqarsimasut isertitsivianneereerluni aasaq iperagaavoq, Aasianni politeeqarfiup ittua Gert Jakobsen oqarpoq. Taanna isumaqarpoq, angut 37-nik ukiulik Rock festivalertoqarnerani ikiaroornartumik amfetaminimik tuniniaanissaminik pilersaaruteqarsimasoq.
37-nik ukiulik inatsit tunngaviusoq naapertorlugu arfininngormat killisiorneqareerluni, sapaatip akunnerini sisamani tigummigallagassanngortinneqarpoq. Taamatut aalajangerneq angutip 37-nik ukiullip nunatta eqqartuussivianut suliassanngorteqqippaa, nunatta eqqartuussiviatalu ullumi aalajangissavaa angut sapaatip akunnerini sisamani tigummigallarneqassanersoq.
