Angut 30-nik ukiulik Nuummi 2025-mi toqutsisimasutut killiligaanngitsumik inissiisarfimmiittussanngortinneqartoq
Angut 30-nik ukiulik aggustimi 2025-mi toqutsisimasutut killiligaanngitsumik inissiisarfimmiittussanngortinneqarluni eqqartuunneqarpoq.
Kalaallit Nunaanni Politiini unnerluussisussaatitaasoq inoqatinut attaveqaammi X-imi marlunngornermi unnukkut taama ilisimatitsivoq.
Arnaq 44-nik ukiulik toqungasoq Nuummi siorna aggustip arfineq-aappaanni nassaarineqarpoq, politiillu pinerluttuliorfigineqarsimasoraat.
Kalaallit Nunaanni Politiit ullualuit qaangiummata nalunaarput, angut taamani 29-nik ukiulik, arnamik toqutsisimasutut unnerluutigineqartoq.
Sermitsiap, Sermersuup Eqqartuussiviani marlunngornermi najuuttup, nutaarsiassiinera naapertorlugu arnaq taanna angutip aapparaa.
Angutip aappani najugaqatigisimallugu ilaannikkullu oqqattartarsimanertik eqqartuussivimmi oqaluttuaraa.
Pulaartoqareernerata kingorna ajortoqartoq
Aappariit unnummi tassani akunnerminni ajortumik pisoqartinnagu pulaartoqarsimasut allanillu imeqateqarsimasut, tusagassiuut allappoq.
Angutip nassuiaanera naapertorlugu, arnap savik iffiukkanut agguut, sumiiffimmi nassaarineqartoq, tigummiarlugu ornippaa.
- Kapiumallunga oqarpoq, savimillu kapineqarnissannut imminut illersorniarlunga qungatsikkut ajappara, angut Sermitsiaqp nutaarsiassiinera naapertorlugu oqarpoq.
Angutip 30-nik ukiullip arnap toqunnissaanik siunertaqarsimannginnini aamma oqaatigaa.
Maannakkut killiligaanngitsumik inissiisarfimmiittussanngortinneqarluni pineqaatissinneqarpoq, tamannalu Kalaallit Nunaanni pinerluttulerinermi inatsimmi pillaatisiat sakkortunerpaartaraat.
Angutip eqqartuussut Nunatta Eqqartuussivianut suliareqqitassanngortinniarnerlugu eqqarsaatigiumasimagaa unnerluussisussaatitaasut ilisimatitsipput.
RITZAU
