Angut 28-nik ukiulik Aasianni tigummigallagassanngortinneqarpoq

Angut 28-nik ukiulik Aasianni nakuusersimallunilu sioorasaarisoq ulluni 15-ini tigummigallagassanngortinneqarpoq. Angut siornatigut aappakuminut sisoorasaarillunilu nakuusersimanini pillugu ukioq 2010-mi novembarip tungaanut nakkutigisaasoq, arfininngormat pinerloqqippoq.
Allattoq Mads Lynge
septembarip 28-at 2009 17:11

28-nik ukiulik aappakuminut inooqatigilersimasaanullu arfininngormat marloriarluni nakuuseriarlunilu ataasiarluni sioorasaareriarluni nunaqarfimmut Attumut umiatsiamik aallarsimavoq, tassanilu Aasianni politiit tigusaraat, taama Aasianni politeeqarfiup pisortarigallagaa Aqqaluk Petersen ilisimatitsivoq.

Angut aggustimi pinerloreerluni sapaatip-akunnera tigummigallagaareerluni eqqartuussisunut sassartinneqarpoq, tassanilu misiligummik anisinneqarpoq. Taamani pinerloqqikkuni pineqaatissinneqartussanngorlugu aappaagu novembarip tungaanut nakkutigisaalerpoq. Suliaq taanna suli ingerlavoq, Nunatta Eqqartuussivianut suliassanngortinneqarluni.

Arfininngormalli tassa pinerloqqinnini pillugu Aasiaat eqqartuussivianut ippassaq sapaammi sassartinneqarpoq, tassanilu aalajangerneqarpoq ulluni 15-ini tigummigallagaassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq