Angut 24-nik ukiulik toqutsisuulluni nassuertoq
Ole Markussen ippassaq ullup qeqqata siorna najugaqarfigisamini toqutaasimasoq nassaarineqarpoq. Angut 24-nik ukioqartoq toqutsisimasutullu pasineqalersoq ualimut eqqartuussisoqarnerani ulluni 26-ni politiinit tigummigallassanngartinneqarpoq.
Toqutsinerminut suna patsisaanersoq qanorlu iliorluni toqutsisoqarsimanersoq politiit maannakkut oqaatigisinnaannginnerarpaat.
Toqutsisoqarsimatillugu paasiniaasartut Danmarkimeersut sapaatip akunnerani tulliuttumi misissuinerat naammassippat toqutsinermut patsisaasoq qanorlu iliorluni toqutsisoqarsimanera avammut nalunaarutigineqarumaartoq Uummannami politiit nalunaarutigaat.
Angut 24-nik ukiulik ippassaq unnukkut nalunaaqutaq arfineq marluk sioqqullugit tigusarineqarpoq, nunatsinnilu politiit pisortaata tullia Morten Nielsen tusagassiuutinut nalunaaruteqarluni Uumannami politiit nersualaarpai, Uummannami pissutsinik ilisimasaqarluarnertik pissutigalugu paasiniaanertik iluatsimmassuk, Morten Nielsen allappoq.
