Angut 23-nik ukiulik ajunaarsimatutut naatsorsuutigaat
Angut 23-nik ukiulik umiatsiamik 16 fodsimik angissusilimmik umiatsiaqarluni, ilaquttani sisamat pujortuleeqqamik aallartut ingerlaqatigalugit, aggustip 31-anni aalisariarput. Angut 23-nik ukiulik siulliulaarluni Naajaap kangiani sermersuup eqqaanut ingerlavoq. Pujortuleeqqami ilaasut umiatsiaq siumoramikku angut 23-nik ukiulik umiatsiamiinngitsoq paasivaat.
- Angutip nasaa aamma iput umiatsiap eqqaani immamiittut pujortuleeqqamiittunit takuneqarput, Upernavimmi politiit pisortarigallagaat Kasper Berthelsen oqarpoq.
Umiatsiap eqqaa ingerlaannaq pujortuleeqqamit misissuiffigineqalerpoq. Upernavimmi politiit qulimiguulimmik attartorlutik ujaasinermi peqataapput. Naajaap kangia aamma sermersuup eqqaa misissuiffigineqaraluarput. Aappilattormiut namminneq piumassutsiminnik aamma ujaaseqataagaluarput.
- Naatsorsuutigaarput iluliaminermut aporsimassasoq, taamaalillunilu umiatsiamit imaanut nakkarsimalluni, Kasper Berthelsen nassuiaavoq. Ujaasisoqareernerata kingorna angut 23-nik ukiulik ajunaarsimasutut maanna naatsorsuutigineqalersoq, Upernavimmi politiit pisortarigallagaat oqarpoq.