Angut 21-inik ukiulik ajunngitsoq nassaarineqarpoq
Angut inuusuttoq qamuteralannik tallimanngormat Ilimanamiit Qasigiannguanukaraluartoq ujarneqaleraluarpoq. Angut 21-nik ukiulik suli sila qaamasoq kisimiilluni Ilimamiit Qasigiannguanukarmat, Qasigiannguani sakkortuumik nittaalereersimavoq.
Allattoq Lotte Holm
marsip 30-at 2009 11:42
Ilimanamiit 30 kilometerit ingerlareerluni Qasigiannguanut kilometerit quliinnanngortut, Eqaluit kangerliumarngani ingerlanerliorluni qamuteralaat kisimi qaqissinnaannginnamigit Qasigiannguanut ilaquttaminut sianermat ilaqutaasut pingasut ujaraluaramikku iluatsinngilaat. Taamaammat Qasigiannguani politiinut ikioqqullutik sianermata, anorersualeruttortoq 17-inillu issittoq politiit pingasut ujarlilerlutik inuusuttup oqarasuaataanut sianeraluaramik sumiiffissinngilaat. Unnuakkut taarsuup issillu ataani, nalunaaqutaq ataatsip qeqqata missaani, Eqaluit kangerliumarngata qinnguani aatsaat angut inuusuttoq nassaaraat, taamatut politiit pisortaat Karl Vinther oqaluttuarpoq.
