Angup nuusiaa Danmarkimi nioqqutaalerpoq
Aviisimi Politikenimi allaaserineqarmat allaatiginnittup aviisimillu atuartartut nuut taanna sisamanik uummatinnatsippaat, nuannarineqarnerpaat arfinilinnik uummatinnatsinneqartarput.
Allaatiginnittup Angu nipilersortartunut nunarsuaq tamakkerlugu tusaamasanut nuannarineqaqisunullu, Coldplayikkunnut, assersuuppaa.
- Angup nipaa sallaatsuullunilu ersarissuuvoq, tassa nipituujunanilu sakkortunani, taamaammat poprockimik erinarsoraangami akiugassaananilu qiimanartumik tusarnernini, kiinnamilu saamarpasinnera, Angup ilisarnaatigaa, aviisimi allaatiginnittoq qiimmatsassimaaqisoq allappoq.
Burning Blue Skies Nunatsinni 2007-imili saqqummerpoq. Angulli nuusiaa siulleq Danmarkimi Radioqarfinnit arlalinnit alutorsaatigineqarluni qangali appisimaarneqartareeraluartoq, nuusiaa kingulleq Danmarkimi nuusiorfinni aatsaat maanna saqqummersinneqalerpoq.
