Angumminik persuttaasoq tigummigallarneqarpoq
Qaarsuni persuttaaneq apriilip arfernanni Uummannami Politiinut nalunaarutigineqarpoq. Politiit aqaguani Qaarsunukaramik, angut 35-t missaannik ukiulik tigusaraat.
- Angut persuttaasimasutut pasineqarluni sapaatit-akunnerini sisamani tigummigallagassanngortinneqarpoq, politimesterip tullia Morten Nielsen oqarpoq.
- Angut utoqqasaaq persuttarneqarnermi kingornagut, Uummannami napparsimmavimmi uninngatinneqaqqaaraluarpoq, kingornali Rigshospitalimut nuutsinneqarluni, tamannalu pivoq Islandimi qaqqap innermik anitsinerata qullaatsitai ajornartorsiortitsilinngikkallarmata, politimesterip tullia Morten Nielsen oqarpoq, angutilli maanna qanoq innera oqaatigisinnaannginnerarlugu.