Angummik 38-inik ukiulimmik kalaallinit kingoqqisumik Aalborgimi toqutsinermi pingaarutilimmik ilisimannittut arlallit Nordjyllandimi politiinut tutsiupput.Assi: Pressefoto/Rigspolitiet

Angummik Aalborgimi toqutsinermi ilisimannittut ilaat tutsiuttut

Angummik 38-nik ukiulimmik kalaallinit kingoqqisumik Aalborgimi toqutsinermi pingaarutilimmik ilisimannittut politiinut tutsiupput. Suliamili tassani pingaaruteqarluinnartumik ilisimannissorisaq politiinut suli tutsiutinngilaq.

Angummik kalaallinit kingoqqisumik Aalborgimi toqutsinermi ilisimannittutut Nordjyllandimi politiinit sapaatit akunnerata sulianili ujaarineqartoq suli tutsiutinngilaq.

Toqutsinermili aamma pingaarutilimmik ilisimannittut allat arlaliusut politiinut tutsiupput.

- Tusagassiuutinut nalunaaruteqarnerput ilisimannittunik allanik tutsiuffigineqarnitsinnik kinguneqarpoq. Taamaammat nalunaaruteqarnerput maangaannanngilluinnarpoq,Nordjyllandimi politikommisæri Carsten Straszek KNR-imut oqarpoq.

Angut 38-nik ukiulik kalaallinit kingoqqisoq Aalborgimi atuakkanik atorniartarfiup Rendsburggademiittup saani ilisimanngitsoq arfininngornermi januaarip 14-iani unnukkut nassaarineqarpoq.  Politiit angut taanna nassaarigamikku suli uumavoq, angutilli taassuma ajoqusingaatsiarsimanini sivitsunngitsoq toqqutigaa.

AAMMA ATUARUK Angut nipilersukkamit akornusersorneqartoq toqutsinermi suliami pingaaruteqarsinnaasoq

Tamatumunnga atatillugu politiit angut toqutsinermi ilisimannissorisartik ujaaraat, angutimmi taassuma angut 38-inik taassumalu ilagisaa alla atuakkanik atorniartarfiup saani nipituumik nipilersugaqarneranni attaveqarfigigai nakkutilliissummik videoaliami takuneqarsinnaalluni ilisimannittut nassuiaapput.

Politiit oqarnerat naapertorlugu angutip pingaaruteqarluinnartumik ilisimannissorisap inuit marluk atuakkanik atorniartarfiup saaniittuut nipilersugaat nipitooq akornutigisimagunarlugu attaveqarfigai.

Angut pingaaruteqarluinnartumik ilisimannisorisaq 35-t 55-illu akornanni ukioqassangatinneqartoq qaamasunk naatsunik nujaqartutut qaamasumillu ameqartutut nassuiaatigineqarpoq. Danskisut oqaluppoq ullorlu taanna meqqulimmik ilupaarusilimmik taartumik qaatigooqarpoq, taartunik qarleqarpoq taartunillu kamippaqarluni. 

Inuit pingasut toqutsisimasutut pasineqarput taakkulu suliamut atatillugu tigummigallarneqarput. Angutit marluk arnarlu 31-t 41-llu akornanni ukiullit pineqarput.

Angut pingaaruteqarluinnartumik ilisimnnisorisaq inuillu allat Aalborgimi atuakkanik atorniartarfiup eqqaani pasinarsinnaasumik arfininngornermi januaarip 14-iani unnukkut takusaqarsimasut Nordjyllandimi politiinut attaveqarnissaannik suli kaammattorneqarput.

Nordjyllandimi politiit oqarasuaataat +45 114-imik normoqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl