Angertut amerlanerussuteqassangatinneqarput
- Una misissuineq tutsuiginarluinnarpoq, inuup CPR-normua aallaavigalugu qinersisartut apeqqutinik akiugassaannik nassissoratsigit. Qinersisartut 18-inik ukioqalereersimasut kisiisa nunaqarfinni illoqarfinnilu najugallit apersorpagut. Nalinginnaasumik qinersisartunik isumasiuinermi telefonbogi atorneqartartoq atorusussimanngilarput, misissuinerput tutsuiginartuutikkusukkatsigu, Pia Vedel Ankersen oqarpoq.
Taama naliliisimanerminnut aamma pissutigaa telefonillit telefonbogimiittut amerlasuut naalagaaffeqatigiinnermik illersuisuusorinarmata. Taamaattumik inuup inuuia sumilu najugaqarnera apeqqutaatillugu apersugassarsiorsimapput.
- Nalornisut ilanngunnagit naatsorsuinitsinni angertut amerlanerpaapput 75 procentiugamik, inuit sisamaagaangata pingasuullutik, naaggaartullu 25 procentiupput, inuit sisamaagaangata ataasiulluni. Angertut tassaanerupput nunaqavissut Kalaallit Nunaata namminersulivinnissaanik tapersersuisut. Naaggaartut tassaanerullutik Kalaallit Nunaanni innuttaasut Danmarkimi inunngorsimasuusut, Danmarkimi inunngorsimasunik angajoqqaallit imaluunniit apeqqutinik qallunaatut allassimasunik akiuerusunnerusut. Soorunami taakku angertortaqarput amerlanerilli naggaartut Danmarkip Kalaallit Nunaatalu Naalagaaffeqatigiiginnarnissaanik illersuisutut oqaatigineqarsinnaasut, Pia Vedel Ankersen erseqqissaavoq.
Ilisimatusarfimmi qinersisartunik isumasiuinerup inerneri allat ulluni tulliuttuni tusarliussinnaasarumaarpagut.