Angerlartitaasartut kingumoortumik tapiiffigineqassapput
Sulisartut pingaartumik tunisassiorfinni nammineq piumassuserinngisaminnik suliffissaarukkallarsimasut Naalakkersuisunit 2 mio. kronenik kingumoortumik tapiiffigineqartussanngorput. Inuussutissarsiutinut naalakkersuisoqarfiup Johan Lund OLsenip SIK Kanukokalu suleqatigalugit maanna misissuiffigileruttorpaat aningaasat qanoq agguaannissaat paasiniarlugu.
Tassunga atatillugu Johan Lund Olsen oqarpoq maanna pisutut pisoqartarnera, tassa ukiup ingerlanerani maanaannaq suliffimmit angerlartitaasarneq naalakkersuisut sillimmartaarfigereeraat, tassa 2004-p siornatigut maannaannaq angerlartitaasarnerit pisareermata januaarip aallaqqaataanit 2005 aalajangersimasunik inatsiseqalersinniarneqarmat maanaannaq suliunnaarsitaariataartarneq pinaveersimatinniarlugu.
2004-mi maanaannaq suliffimminnit angerlarsitaasarsimasut nammineq piumassuserinngisaminnik sulinngitsoorfigisimasatik tamaasa kingumoortumik tapiiffigineqaatigissaneraat Johan Lund Olsenip maanna erseqqissumik oqaatigisinnaannginnerarpaa, kisianni tassunga atatillugu aningaasat 2004-mi atunngitsoorsimasat atorneqarumaartut oqaatigaa.
Aamma oqarpoq aningaasanik agguassinerit sapinngisamik piaarnerpaamik pissasut, siunissamilu ukiup ingerlanerani maanaannaq suliunnaartitaariataartut nutaamik aaqqissuussiffinissaannik siunnersuusiortut suliartik maanna ingerlatileruttoraat ukiaru inatsisartut ataatsimiinneranni saqqummiussassanngorlugu.
