Angerlarsimaffiup avataanut inissinneqartartut ikilisarniarneqalerput

- Piaartumik iliuuseqartariaqarpugut. Meeqqap assersuutigalugu aqqaneq-marlunnik ukiullip angerlarsimaffiup avataani inissinneqarsimasup perorsarniarneqarnera ajornakusoornerulissaaq, pingaartumik sumiginnagaasimappat. Aqqaneq-marlunnik ukiulik pinerlunniartalereersimasinnaavoq, taamaammat meeqqat sumiginnagaasimasut piaartumik iliuuseqarfigisariaqarpavut, Maliina Abelsen oqarpoq, nangillunilu:

- Meeqqap peroriartornerani malinaavigiuarneqarnissaa aamma pingaaruteqarpoq. Meeqqammi inuunermi sinnerani angerlarsimaffiup avataani inissisimatinneqartuarnissaa anguniarneqanngilaq. Meeraq pillugu pilersaarusiortoqartariaqarpoq. Meeraq inuunermini atugarliortitaappat qanoq iliornikkut ilorraap tungaanut sangutissinnaavarput? Ilaqutariinni inuuniarnerup pitsanngorsarneqarnissaa pingaaruteqarpoq, meeraaneraniilli iliuuseqartoqartariaqarluni. Taamaalioraannimi aningaasartuutit sapinngisamik ikinnerpaaffimminiitinneqarnissaat angusinnaassavarput,

Maliina Abelsen nunatsinni angerlarsimaffiup avataanut inissiisarfiit pillugit nalunaarusiaq nutaaq saqqummiunneqarmat oqarpoq.

Aningaasat 220 millionit koruunit missaat meeqqanut angerlarsimaffiup avataanut inissinneqartussanut innarluutilinnullu ukiumut maanna atorneqartarput.

- Aningaasat affaat ilaqutariit sullinneqarnerannut atortuugutsigit, ajornartorsiutit immaqa ikinnerulissagaluarput. Ilaqutariinni ajornartorsiutit, soorlu imigassanik aanngajaarniutinillu atornerluisunik katsorsaasarnernut aningaasartuutit immaqa ikilissagaluarput, Maliina Abelsen oqarpoq.