Assi: Paalu Møller/KNR

Angerlarsimaffiup avataaniittut ilisimatusarfigineqartut

Kalaallit meerartaat ulloq unnuarlu angerlarsimaffinni peroriartortarnerat qanoq kinguneqartarpa? Tamanna ukiup 2020-ip naalernerani ilisimasaqarfiginerulersimassagunarparput.

Ilisimatuussutsikkut suliap siorna aallartittup, meeqqanut Kalaallit Nunaanni ulloq unnuarlu paaqqinnittarfinni 20-iusuni peroriartornerannut qanoq sunniuteqarnersoq paasiniarneqalerpoq.  

Bonnie Jensenip, Ilisimatusarfimmi Aningaasaqarnermut Tusagassiornermullu Ilisimatusarfimmi ph.d.-nngorniarluni ilisimatusartup, ulloq unnuarlu paaqqinnittarfiit pingasut, Tasiilami, Kangerlussuarmi Maniitsumilu ittut siorna tikeraarpai. Bonnie Jensen KNR-imut mail-ikkut taama allappoq.

AAMMA ATUARUK Ulloq unnuarlu paaqqinnittarfinnut inissiisarneq sukateriffigineqalerpoq

Bonnie Jensenimut pingaaruteqartorujussuuvoq meeqqat inuusuttullu namminneq oqaatsitik atorlugit, ilaquttatik qimallugit ilaatigullu illoqarfimmi allami ulloq unnuarlu paaqqinnittarfimmi peroriartornermik qanoq sunniuteqarnera pillugu oqaluttuarnissaat.

- Ulloq unnuarlu paaqqinnittarfiit ilisimatusarluni suliami suleqataapput pingaaruteqarluinnartut. Paaqqinnittarfinnilu taakkunani sulisut meeqqanik ilisarisimannilluartuusarput, angajoqqaanullu attaveqaataasarlutik, meeqqat apersorneqarnissaat pillugit akuersisussanut, Bonnie Jensen mail-ikkut KNR-mut allappoq.

AAMMA ATUARUK Qaasuitsup Kommunia ulloq unnuarlu paaqqinnittarfimmik pilersitsilersoq

Aasap ukiallu ingerlanerini ulloq unnuarlu paaqqinnittarfiit allat arlallit tikeraarneqassapput,  tassani meeqqat 
atuarfimmi qanoq ingerlanersut, ikinnguteqarnersut aammalu namminneq meeraqalerunik taakku ulloq unnuarlu paaqqinnittarfinni najugaqarnissaat takorloorsinnaaneraat apeqqutigineqartassallutik.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl