Angerlarsimaffiup avataani inissitaq toquvoq

Meerannguaq marluk inorlugit ukiulik januaarip aallartinnerani Nuummi toquvoq ilaqutariinni paaqqutarinnittuniitilluni.

Ullup qeqqanut radioavisimi vicepolitimester Morten Nielsen oqarpoq, ullumi matoqqasumik killisiuineq pisimasoq, sapaatit akunnerini sisamani tigummigallagassanngortitsinermik kinguneqartumik.

Arlaannaataluunniilli toqqaannartumik oqaatiginianngilaa ilaqutariit paaqqutarinnittut arlaat tigummigallagassanngortinneqarsimanersoq. Kisianni Nuummi Inunnik Isumaginninnermut Immikkoortortaqarfimmi pisortap tullia, erseqqissaavoq meerannguup ilaqutariinni paaqqutarineqarnerata nalaani ajuusaarnartumik pisoqarsimasoq.

Immitsinnut nalilersuiffigivugut paasiniarlugu arlaatigut pitsaanerusumik iliuuseqarsimasinnaagaluarnerluta. Taamatummi pisoqartillugu pisoq nalilersoqqittariaqartarparput, misigisat matumani ajuusaarnaqisut siunissami iluaqutaasinnaasumik kinguneqartinniarlugit, Jette Krag Radioaviisimut oqarpoq.

Annerusumillu oqaaseqarnianngikkallarpoq politiit sukumiinerusumik misissuimmata.

Nuup kommuneatali Ilaqutariit paaqqutarinnittartut, Inunnik isumaginnitseqarfimmi sulisut, minnerunngitsumillu meeqqap toqusup ilaqutai ikorfartornissaat isumaginissaallu qulakkeerniaraa, Jette Krag oqarpoq.

Nuummi Ilaqutariinnik Paaqqutarinnittartut Peqatigiiffiata, tusagassiuutitigut nalunaarumminni erseqqissaatigaat ukiuni pingasunngortuni meeqqat inuusuttullu ilaqutariinnut inissinneqartartut qanoq paaqqutarineqartassanersut pisortanit pikkorissaaffigineqartariaqartoq piumasaqaatigalugu.