Angerlarsimaffinnut ornigullutik akiilisitsiniartartut

Eqqartuussiviup akiilisitsiniarneranut takkutinngikkaanni kinguneqassaaq. Taama eqqartuussiveqarfik tusagassiuutinut nalunaarummini allappoq.

Taamaattumik eqqartuussiveqarfiup akiliisitsiniartartui angerlarsimaffinnut piffissani assigiinngitsuni ornigullutik akiliisitsiniartalissapput, akiitsullip akiligassaminut akiliinissaa imaluunniit akilersuinissamut isumaqatigiissusiornissaa suliariartorlugu.

Novembarip 24-ani akiliisitsiniartartut marluk akiliisitsiniarlutik angerlarsimaffinnut arfinilinnut siullerpaamik unnukkut ornigupput:

- Akiitsullit pingasut angerlarsimaffiini naammattoorpagut, taama akiliisinitsiartartoq Lena Engstrøm oqaluttuarpoq, nangillunilu:

- Akiitsullit ajuusaarput. Ataaseq aperivoq ullup tulliani aggersarneqaqqissinnaanerluni. Nassuiaapparpulli aggersarneqareersimagami takkunnissaminut periarfissaqareersimagaluartoq. Orniguppugut akiilisitsiniarnerput naammassiniarlugu tigusarinninnissanillu pinaveersaartitsiniarluta.

Eqqartuussiveqarfik tusagassiuutinut nalunaarummini nangilluni allappoq, pisut ilaanni tigusarinninnisssaq piariaqartillugu, tigusarineqartoq eqqartuussiviup akiliisitsiniartarfianut piaarnerpaamik sassartinneqartarumaartoq. Akiitsoqartorli tigusarineqaruni isertitsisarfimmi unnuisinneqaratarsinnaasoq.

Eqqartuussiveqarfiup neriuutigaa angerlarsimaffinnut ornigulluni akiisitsiniartalerneq, akiitsoqartut aggersarneqartillutik takkuttalernerannik kinguneqarumaartoq.