Angerlarsimaffinni persuttaasoqartarnera Arnat ulluanni oqallisigaat

Inuit ataqatigiinniit inuiaqatigiit peqatigersusuppagut, angerlarsimaffinni persuttaasarneq qaangerniarlugu suliniarnissatsinnut, immersuisutullu aamma atorumallugit oqalliseqatiginiarlugit, ajornartorsiut taanna pillugu, Inatsisartunut ilaasortaq, Olga P. Berthelsen, oqarpoq.

- Angerlarsimaffinni persuttaasoqartarneranut assigiinngitsunik peqquteqarsinnaavoq. Ilimagaarput nukappiaqqat perorsarneqarnerminni niviarsiaqqanut naleqqiullutik pisussaaffilersorneqarpallaaratillu akisussaaffilersorneqarpallaarsimanngitsut. Misissuinerit kingulliit takutippaat, nukappiaqqat niviarsiaqqanut naleqqiullutik inuunerminnik iluarisimaarinninnginnerusut. Nukappiaqqat niviarsiaqqallumi peroriartornerminni inersimasunngoriartornerminnilu imminnut naammagisimaanngikkunik artorsaateqartassapput. Taamatullu misigineq suliarineqanngippat, persuttaanermut saassinnaaneq qanittuarasuussaaq, Olga P. Berthelsen oqarpoq.

Inatsisartut upernaaru ataatsimiinnissaannut Inuit Ataqatigiit siunnersuuteqassapput, persuttaasarneq akiorniarlugu nuna tamakkerlugu iliuusissanut naalakkersuisut pilersaarusiussasut.