Angerlarsimaffinni eqqissiviilliornerit amerliartoqaat

Ukioq 2012-mi angerlarsimaffinni eqqissiviilliornerit 2.864-upput. Taakkunannga 879-it illoqarfiit pingaarnersaanni pipput. Ajoraluartumillu taama pisoqartillugu angajoqqaat kamaannerannik unataannerannillu meeqqat isiginerlutsinneqartarput. Angerlarsimaffinni eqqissiviilliornerit amerlassusaat akuersaaruminaappoq pingaartumik meerarpassuit ilanngunneqartarmata.
januaarip 07-at 2013 10:15

- Politiinit kissaatigigaluarparput kisitsisit taakku appartinnissaat. Tamanna aatsaat pisinnaavoq inersimasut kamaatilinnginnerminni eqqarsaqqaartartuuppata. Isumaqarpugut nakuusernernik nalunaarutiginninnerit ikilisarneqarsinnaasut ornigulluni eqqissisaasarnertigut, Nuup politiiviniit Niels Nyvang oqarpoq.

Nuummi politiit suliaasa ilagaat viinninngersut ilaat viinnimik 370 koruunimik akilimmik akiliiniarluni 'puigorsimasoq'. Taanna puiaasap akiata marloriaataanik akiligassinneqarpoq.

Aqqusinikkut angallannermi piumasaqaataavoq assakaasulimmik motorilimmik ingerlatsissagaanni 18-ileereersimanissaq. Tamannali angutip 18-nik ukiullip puigorsimagunarpaat arnaatini 15-nik ukiulik biilimik ingerlatsinermut misiliitikkamiuk. Tamanna pillugu niviarsiaraq allagartaqarani ingerlatsisimasutut akiliisinneqartussanngorpoq taamatuttaarlu angut inuusuttut arnaamminik misiliititsinini pillugu akiligassinneqarpoq.

Hotel Hans Egede juullip ukiortaallu akornanni tillinniarfigineqartoq ukiortaap kingorna tillinniarfineqaqqippoq. Tillinneqartut tassaapput fladskærmit 7 tommit akunnittarfiup toqqorsiviani tillinneqarsimasut. Politiit innuttaasut ikiortiseraat tillinniarnermut atatillugu paasissutissaateqarunik imaluunniit fladskærminik akikinaarujussuakkanik tuniniaaffigitissimagunik saaffiginnequllugit. Nuummi politiit attavigineqarsinnaapput oqarasuaat 70 1448 atorlugu.