Angerlarsimaffimmut ujajaasut tallimaat tigusarineqarpoq

Qaqortumi politiit tallimanngormat kingumut tigusarinnipput. Sapaammi decembarip qulingiluaani angerlarsimaffimmut ujajaanermut atatillugu tigusarineqartut taamaasillutik tallimanngorput.

Politiit sapaatip akunnerata siuliani ataasinngormat marlunngormallu angutit inuusuttut sisamat 16-init 19-inut ukiullit tigusaraat. Tallimanngormallu tallimassaat tigusarineqarpoq.

- Pineqartoq januaarip pingajuata tungaanut tigummigallagassanngortinneqassaaq. Januaarip aallartinnerani eqqartuussivikkut suliarineqarnissaa naatsorsuutigaarput, vicepolitikommissær Bent Ole Kleist KNR-gl-imut oqarpoq.

Qaqortumi ujajaasoqarneranut sakkortuunut marlunnut atatillugu maanna angutit inuusuttut arfineq-pingasut tigusarineqarput. Niuertarfimmut angerlarsimaffimmullu ujajaanerit pineqarlutik.

- Suliat assigiinngitsut marluk pineqarput, Ole Kleist naqissusiivoq.