Angerlarsimaffimmi eqqissiviilliornerit aqqusinermilu perulluliornerit ukiortaami amerlasimapput
Sumiiffinni 14-ini ima sakkortutigisumik angerlarsimaffimmi perulluliortoqarsimavoq politiit eqqissisaajartorlutik orniguttariaqarsimallutik. Nuummi annersaanerit pingasut paannittoqarnissaa pinngitsoortinniarlugu politiit unitsittariaqarsimavaat.
Ukiup sapaatit akunnerisa kingullersaanni aamma pisiniarfinnut tillinniarnerit arlaqarsimapput aammalu nakuusertoqarsimaneranik nalunaarutiginninnerit pingasut tiguneqarsimallutik. Tamannalu 2012-imi nakuusernerit kisitsimmut qaffasippallaarujussuartumut 242-mut pineranik kinguneqarpoq.
TELE-mut tillinniarujussuartoqarnera pillugu paasissutissanik nutaanik suli takkutoqanngilaq, naak tillinniarnerup paasiniaaffigineqarnerata naammassineqarnissaanut paasissutissanik tunniussisunut akissarsiassaqartitsisoqaraluartoq. Aamma Kangillinnguit Atuarfiat tillinniarfigineqarsimavoq, tassanilu aningaasivissuaq ammarniarsarineqarsimavoq. Tillinniarnermut atatillugu suut amigaatigineqarnersut suli erseqqissumik paasineqanngilaq, bussimulli ilassutissat amerlasuut tillinneqarsimapput.
Kiisalu Hotel Hans Egede, akunnittarfiup juullip ukiortaallu akornanni matoqqanerani, tillinniarfigineqarsimavoq. Isiginnaarutit pingasut tillinneqarsimapput. Tillinneqartut tassaapput isiginnaarut Sharp 40"-i nutaarsuaq isiginnaarutillu pisoqaanerusut 32"-it marluk.
