Angerlarsimaffiga eqqissinerup angerlarsimaffigaa

Issittormiut unammiuaarnerat Canadami Yukonimi, illoqarfimmi Whitehorsemi, marsip sisamaanniit qulingat ilanngullugu pisussaavoq.

Inuusuttut taama amerlatigisut soqutiginnillutik saaffiginninnerat, NAPA-p pisortaata, Leise Johnsenip nuannaarutigaa.

- Inuusuttut Avannaanit, Kujataanit,Tunumit Kitaanillu saaffiginnipput. Pikkorissorpassuit peqataarusukkaluarput qinnuteqartulli akornanni arfineq-pingasut apersorniarlugit aalajangiiffigaavut. Illoqarfeqatiginngisat qarasaasiaq atorlugu Skype-kkut attavigalugit oqaloqatigaavut, NAPA-mi pisortaq, Leise Johnsen nuannaaqaluni oqarpoq nangillunilu.

- Arctic Winter Games kalaallinut inuusuttunut tusarnaartitsinermik isiginnaartitsinermillu soqutigisalinnut ineriartortitseqataasimaqaaq. Inuusuttut qanoq iliorunik ajunnginnerpaamik angusaqarnissaannik misilittagalinnit siunnersorneqartarput, Leise Johnsen oqarpoq.

Nunarput sinnerlugu isiginnaartitsisussat takutissavaat isiginnaagassiaq "My Home is Home of peace" kalaallisuunngorlugu "Angerlarsimaffiga eqqissinerup angerlarsimaffigaa".

Ruth Montgomery Andersen takutitsisussanut siulersortaassaaq ukiormannali nangitsisussatut piukkussat Randi Broberg aamma Alexander Montgomery Andersen peqataassapput. Ilimanarsinnaavoq inuusuttut taakku siunissami kulturikkut takutitsisunut siulersortaasalersut.

Kulturikkut takutitsinerit 2006-miit NAPAp akisussaaffigisarpai.

AWG 2012-imi takutitseqataasussatut uku toqqarneqarput: Pauline Kristiansen 17-inik ukiulik, Upernaviup eqqaani Nuussuarmiu, Alberthine Frederiksen 16-inik ukiulik, Kangaatsiap eqqaani Iginniarfimmiu, Nicholas Høegh Hornum, 14-inik ukiulik aamma Sikkerninnguaq Kleist 19-inik ukiulik, Inunnguaq Johansen 19-inik ukiulik, aamma Nina Kristoffersen 16-inik ukiulik, kingulliit taaneqartut tamarmik Nuummeersuupput.