Angerlarsimaffeqaratik inuuneqalernissaannut qanittuaraasarput
Danmarkimi pissutsit atugassaritaasullu misissorluaqqaarnagit danmarkimut nuuttartut angerlarsimaffeqarneq ajorput, Jeppe Bülow Sørensen Aalborgip kommuneani kalaallinut sullivissimmi pisortaq oqarpoq.
Kalaallit Aalborgimut tikittartartut assigiinngitsunik patsiseqarlutik tikittarput soorlu ilai meeqqatik ilaquttatillu qaninnerujumallugit aamma ilaqarput nunatsinni aningaasarsiornikkut ajornartorsiuteqartut suliffissaaleqisut imaluunnit inissaaleqineq pissutigalugu Danmarkimut nuuttarput, Danmarkimi periarfissat ajunnginnerusutut takorloorneqarlutik.
Kalaallit angerlarsimaffeeruttartut siornatigut atukkamikkut ajornartorsiuteqartarsimanngillat, Jeppe Bülow Sørensen oqarpoq.
-Taakkuami nunatsinni illoqarfiit ilaanni suliffeqarlutillu angerlarsimaffeqarput, sunali tamarmi akisuallaarsorineqalerpat, meerarluunniit danmarkimi efterskoleriarsimappat tamakku ilaatigut patsisiliullugit danmarkimut nuuttoqartarpoq danmarkimilu suliffissasiortoqarluni, Jeppe Bülow Sørensen oqarpoq.
Danmarkimi suliffissaaleqineq annertoorujussuuvoq pingaartumik danskit oqaasiannik piginnaasaqanngikkaanni, Jeppe Bülow Sørensen oqarpoq.
Aalborg Kommuneani kalaallinut immikkut sullissvimmi kalaallit Aalborg-imut tikittut isumagineqartarput taakkua suliffeqanngitsuusinnaapput aamma inuttut ajornartorsiuteqartuusinnaallutik.
Danmarkimi isumagininnikkut ilisimatusarfimmi SFI-imi kalaallit Danmarkimi angerlarsimaffeqanngitsut naatsorsorneqarput.
Taakkua pillugit nalunaarusiortoqarpoq, tassanilu takuneqarsinnaavoq Danmarkimi kalaallit angerlarsimaffeqanngitsut akornanni Aalborg-imi amerlanersaasut. Aalborg-imi angerlarsimaffeqanngitsut 26 procentii kalaaliupput.
Kisitsisit saqqummiunneqartut Jeppe Bülow Sørensen-ip ilisarisinnaanngilai taamaattumik Aalborgip Kommuneani kalaallit angerlarsimaffeqanngitsut sapaatip akunnerani 47imi aamma 48milu kisinneqassapput, Jeppe Bülow Sørensen oqarpoq, taassumalu ilisimanerarpaa Aalborgimi kalaallit arlaqartut aalajangersimasumik najugaqarfeqanngitsuusut.
Aalborgip Kommuneani kalaallinut immikkut sullissivimmi Grønlandsenheden-imi pisortap Jeppe Bülow Sørensenip nassuiaatissaqartinngilaa sooq Aalborgimi kalaallit taama amerlatigisut angerlarsimaffeqannginnerat.
Kalaallit Aalborgimi taama amerlatiginerannut pissutaasorineqartut tassaapput, Nuup kommunerisimasaa aamma Alborgip Kommunea siornatigut kommunetut ikinngutigiinnikuunerat, suliffeqarfissuillu kalaallit nunaannut attuumassuteqartut Aalborgimi allaffeqarfeqarnerat, amerlasuullu Jyllandip avannaani kalaalinik ilaqutaqarnerat.
