Angerlarsimaffeqanngitsut tuniniaasalissaqqaarput
Maannali neriuutisaqarluartoq, "Hus forbi"-minngaanniit nalunaarutigineqarpoq:
- Aarlerinartoqanngilaq. Aviisermi Kalaallit Nunaannut nassiunneqareerpoq. Pissutsit assigiinngitsut pissutigalugit aviisit tuniniarneqartussat siulliit Kalaallit Nunaannut nassiussinnaasimanngilagut. Sulisummi taarseraassimapput, sulisullu nutaat suleriaatsinut nutaanut iserniarnissaat eqqarsaatigisariaqarsimallutigit, Michael Larsen, "Hus forbi"-mi tuniniaanermut immikkoortortaqarfimmeersoq oqarpoq.
Tassa pissutsit assigiinngitsut eqqarsaatigineqartariaqarsimapput, angerlarsimaffeqanngitsullu aviisimik taassuminnga tuniniaasinnaasimanatik.
Tuniniaanissalli aallartinneqarnissaa, Michael Larsenip isumalluarfigaa:
- Suleqatigiilernissarput qilanaarutigaarput, ajornartorsiuteqartummi ikiorneqarnissaat neriuutigeqaarput, Michael Larsen oqarpoq.
Aviisip "Hus forbi"-p Nuummi tunisaalernissaa ukioq manna februaarimi oqaluttuaraarput, angerlarsimaffeqanngitsullu taamanikkut nuannaaqaat:
- Periarfissinneqarnerput nuannareqaara. Uninnganerminngaanniit suliaqalernermut. Tuniniaasalerluni. Saniatigut akissarsiaqalaarluni. "Hus forbi" pissangassutigeqaarput, Mackinnguaq Petrussen taamanikkut angerlarsimaffeqanngitsoq oqarpoq.
Taanna Qaqortumut maanna nooreerpoq, angerlarsimaffeqarlunilu. Nuummili angerlarsimaffeqanngitsut 100-nit amerlanerusut aviisi "Hus forbi" tuniniarsinnaassavaat.
Kalaallit Danmarkimi najugallit, angerlarsimaffeqanngitsulli amerlasuut, aviisimik "Hus forbi"-mik tuniniaasartut, Michael Larsenip oqaatigaa.
Aviisi "Hus forbi" Danmarkimi angerlarsimaffeqanngitsut aviisiat ukiumut aqqaneq marloriarluni saqqummersinneqartarpoq. Aviisi 20 koruuninik akeqarpoq, taakkunannga 8 koruunit tuniniaasumut aningaasarsiaritinneqartarlutik.