Angerlarsimaffeqanngitsut sinnikusorfiat qaqorsaammik toqunartumik kuerarneqartoq
Akikitsunik pisiniarfissuup Lidlip Sverigimi Stockholmimi pisiniarfiani sulisut, pisiniarfissuup eqqaaviini containerini inuit angerlarsimaffeqanngitsut nerisassanik sinnikunik ujaasisarnerat qatsulluinnaramikku, qaqorsaat toqunartortalik nerisassanut kuerarsimagaat, Danmarks Radiop nittartagaani ullumi allaaserinnittoqarpoq.
Allattoq Louise M. Kleemann
Pisiniarfissuaq inuit inuunerannik ulorianartorsiortitsisimasutut maanna politiinut tunniunneqarpoq.
Taama iliuuseqarneq Sverigimi angerlarsimaffeqanngitsut peqatigiiffiata quarsaarutigeqaa.
- Tamanna aliasuutissaallunilu kamannaqaaq. Tassami matumani pineqartut tassaapput inuit nerisassaqarniarlutik eqqaavissiortariaqartartut, Rolf Nilsson peqatigiiffik sinnerlugu oqarpoq.