Angerlarsimaffeqanngitsut qassiuneri paaserusuppai
Taanna Naalakkersuisunut katillugit tallimanik apeqquteqaateqarpoq.
Angerlarsimaffeqanngitsut illunullu iserfissaqanngitsut pillugit paasissutissat Olga P. Berthelsenip killeqarnerarpai.
- Kalaallit Nunaanni angerlarsimaffeqanngitsunik Ilaqutariinnermut Peqqissutsimullu Naalakkersuisoqarfiup siorna novembarimi misissuisitsinera naapertorlugu Nunatsinni - Nuuk ilanngunnagu - angerlarsimaffeqanngitsut 514-iupput.
- Qularnanngilaq Nuuk ilanngunneqarsimagaluarpat, kisitsit eqqartorneqartoq annertunerujussuussagaluartoq, Olga P. Berthelsen ilaatigut allappoq, § 36-ilu naapertorlugu apeqquteqaatimini ilaatigut oqaatigalugu angerlarsimaffeqanngitsut amerliartuinnartut.
- Inuit kikkulluunniit sunilluunniit peqquteqarlutik angerlarsimaffeqanngitsut, ulluinnarni inuuniarnikkut, inooqatigiinnikkut, tarnikkut timikkullu atugaat sakkortoorujussuupput, Olga P. Berthelsen allappoq, paasissutissallu Naalakkersuisunit tunniunneqartussat pisariaqartinneqarnerat erseqqissaatigalugu.
- Siunissaq ungasinnerusoq eqqarsaatigalugu, qanoq iliuuseqarnissatsinnut atorfissaqartippavut, allappoq.