- Aningaasatigut inornanngitsumik inissaqarnissaq, tamannalu inuit pisinnatitaaffiinut ilaavoq. Inuiaqatigiit atugartuut kikkulluunniit inissaqarnermut politikkeqartariaqarput inuit tamarmik tulluartumik akilimmik inissaqartitsinerannik imalimmik, Steven Arnfjord oqarpoq.Assi: Ilisimatusarfik

Angerlarsimaffeqanngitsut pillugit suleqatigiissitaliortoqarnera nuannaarutigineqartoq

Angerlarsimaffeqanngitsut amerliartuinnartut pillugit suleqatigiissitanik Naalakkersuisut pilersitsiniarlutik aalajangerput. Kiisami, immikkut ilisimasalik oqarpoq.

Isumaginninnermut Naalakkersuisoq Martha Abelsen nunatsinni angerlarsimaffeqanngitsut amerlanerulersimanerannik naliliivoq. Taamaattumik angerlarsimaffeqanngitsut inersimasullu navianartumi inissisimasut ikiorniarpai, qanorli iliuusissat nalornisoorutigalugit. Taamaattumik suleqatigiissitat immikkut ilisimasallit aappaagu piareeqqasussamik iluarsiissutissamut siunnersuusiussapput.

AAMMA ATUARUK Kalaallit Danmarkimi inuuniarnikkut ajornartorsiortut pingasuugaangata ataaseq nakuuserfigineqartartoq

Steven Arnfjordip, Ilisimatusarfimmi sociologiusup ilisimatuussutsikkullu misissuisuusup Naalakkersuisuniit kiisami taama iliuuseqartoqarnera nuannaarutigaa.

Inissiat inornanngitsumik akillit inuit pisinnaatitaaffiinniittoq

- Aap, ilumut kiisami. Ukiorpassuit matuma siornatigulli tamanna pisussaagaluarpoq, kisianni siornatigut pisut massakkut maalaarutigisinnaanngilavut. Martha Abelsenip tamanna ukkatarilermagu assut nuannaarutiginarpoq, Steven Arnfjord oqarpoq.

Isumaqarpoq ilaatigut angerlarsimaffeqanngitsut akissaqartitaannik inissaqartinnissaat pilersinneqartariaqartoq.

- Taanna ilaatigut taaneqartarpoq aningaasatigut inornanngitsumik inissaqarnissaq, tamannalu inuit pisinnatitaaffiinut ilaavoq. Inuiaqatigiit atugartuut kikkulluunniit inissaqarnermut politikkeqartariaqarput inuit tamarmik tulluartumik akilimmik inissaqartitsinerannik imalimmik, Steven Arnfjord oqarpoq.

AAMMA ATUARUK Aasianni unnuisarfittaaq angerlarsimaffeqanngitsunut iluaqutaassaaq

Namminersorlutik Oqartussat naapertorlugit 2017-imi angerlarsimaffeqanngitsut 841-upput. Isumaginninnermut Naalakkersuisoq isumaqarpoq kisitsit qaffassimasoq, naak kisitsisitaliinngikkaluarluni. Assi: KNR

Aamma nunatsinni angerlarsimaffeqanngitsut qassiuneri paasilluarneqartariaqarput, isumaqarpoq.

- Angerlarsimaffeqanngitsunik kisitsinermik taaneqartartoq amigaatigaarput, periaaserlu taanna Europami, Alaskami, Canadap Avannaani aamma Skandinaviami ingerlanneqartarpoq, periaaserlu erseqqissuuvoq nunallu assigiinngitsut imminnut naleqqiunneqarsinnaanerannik kinguneqarluni.

Qassiiusut akiligassaqarneq pillugu angerlarsimaffeqanngitsuusut

Namminersorlutik Oqartussat naapertorlugit 2017-imi angerlarsimaffeqanngitsut 841-upput. Isumaginninnermut Naalakkersuisoq isumaqarpoq kisitsit qaffassimasoq, naak kisitsisitaliinngikkaluarluni.

Taamatut isumaqarnerminut ineqarnermut akiligassanik kinguaattoorneq pissutigalugu iniminnik anisitaasut amerlanerulersimammata Martha Abelsenip tunngavilersuutigaa.

- Amerlanerujartuinnartut aalajaatsumik inuuneqarnissaminnik sapangiisut taamalu angerlarsimaffeeruttut qanoq iliuuseqarnata isigiinnarsinnaajunnaarpavut, Isumaginninnermut Naalakkersuisoq Martha Abelsen tusagassiuutinut nalunaarummi oqarpoq.

AAMMA ATUARUK Angerlarsimaffeqanngitsunut containerit pillugit nalilersuisoqassaaq

Taakkununngalu ilaapput inuit nakkaakkiartortutut inissisimasut imigasssamik hashimillu atornerluisutut, aningaasanoortutut immaqalu pinerluttalersutut. Nigalik ajortumut ingerlasoq unitsittariaqartoq, oqarpoq.

- Innuttaasut angerlarsimaffeeruttut angerlarsimaffeerunnermullu ingerlasut ikiortariaqarpavut, Naalakkersuisoq Martha Abelsen oqarpoq.

Sueqatigiissitat immikkut ilisimasallit aaqqiissutissamik siunnersuusiussapput aappagu maajimi naalakkersuisumut Martha Abelsenimut tunniussassamik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat