Angerlarsimaffeqanngitsut kisermallu 70-it Nuummi juulliararsiortinneqarput

Angerlarsimaffeqanngitsut kisermaallu Nuummi Juullisiortinneqarmata inuit 70-it peqataapput. Siorna 40-t peqataapput, tassalu ukioq manna marloriaatingajaallutik. Sermitsiap nittartagaani tamanna atuarneqarsinnaavoq.
Allattoq Jens Thorin
decembarip 28-at 2009 07:16

- Peqataasut ilimagisatsinniit amerlanerupput. Nerrivilioratta inissat qulinik ilasariaqarsimavagut, aammalu neqinik naatsiianillu nunguutsilluta. Angerlarsimaffeqanngitsut kisermaallu juullisiortinneqarnerannut Nuummi suliniaqatigiiffimmeersoq Morten Christensen Sermitsiamut taama oqarpoq.

Puulukimineq siataq medisterillu sassaalliutigineqarput. Nerisassat Pisiffimmiit KK Engros-miillu tunnissutigineqarput, Nerisarfillu nerisassiortuulluni.

Juullisiortitsineq katillugu 15.000 koruuneqarpoq.

Atuarfik Samuel Kleinschmidtimi juulliaqqami ualikkut nerersuartitsisoqarmat, inuit aqqaneq marluk kajumissutsiminnik suleqataapput.

Angerlarsimaffeqanngitsut Nuummi sisamassaa juullisiortinneqarput, kisermaallu aappassaa Juullisiortinneqarlutik.

- Angerlarsimaffeqanngitsut kisermaallu amerlaqatigiissimanissaat ilimagaara, taamatulli aaqqissuussinermut peqataasut ukioq manna amerlanerunerat angerlarsimaffeqanngitsut amerlisimanerannik takussutissiinersoq oqaatigisinnaanngilara, Morten Christensen Sermitsiamut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq