Angerlarsimaffeqanngitsut Inuit Ataqatigiit iliuuseqarfigeqquvaat

Inuit angerlarsimaffeqanngitsut, illumik iserfissaqanngitsut, pillugit Naalakkersuisut qanoq eqqarsaatersuuteqarpat? Angerlarsimaffeqanngitsut nalunaarsorneqarsimasut tunngavigalugit atugaannik pisariaqartitaannillu misissuivigineqarnissaannik pilersaaruteqartoqarnerluni? Apeqqutit tamakkua Inatsisartuni ilaasortap IA-meersup Storm Ludvigsenip § 36 najoqqutaralugu Naalakkersuisunut apeqqutigai.
juulip 16-at 2009 07:37

Ukiaq qalliartulerpoq, silalu nillertikkiartuleraangat sialuk, anori nittaalarlu takkukkaangata, inummut iserfissaqanngitsumut aatsaat tassa atugarliornarsisarpoq, Storm Ludvigsen oqarpoq. Taanna Nuummi angerlarsimaffeqanngitsut unnuiffigisartagaani sulisimavoq, taamalu ajornartorsiutit taamaattut ilisimalluarlugit.

Nuummi inuit angerlarsimaffeqanngitsut arlallit iserfissaqannginnertik pissutigalugu 2007-ip kingornagut toqukkut qimagupput. Angerlarsimaffeqannginneq Nuummi kisimi ajornartorsiutaanngimmat, Storm Ludvigsenip ajornartorsiutip nuna tamakkerlugu assigiimmik aaqqiivigineqarnissaa ujartorlugu § 36 najoqqutaralugu apeqquteqaanni tunngavilersorpaa.