VIDEO Angerlarsimaffeqanngitsup 73-inik ukiullip ikiuukkumasorpassuit tupaallaatigigai

Angerlarsimaffeqanngitsoq 73-inik ukioqartoq, Louis Hansen, Nuup illoqarfiata avatinnguani tupermi najugaqartoq pillugu oqaluttuaq inuppassuit attortissutigaat. Pineqartullu tamanna tupaallaatiginerarpaa.

Allattoq Bikki P. Kleist, Camilla Dam

oktobarip 31-at 2014 10:50

Ilanngutassiaq nittartakkatsinnut ikkunneqarmalli Facebookikkut amerlasuunit oqaaseqaateqarfigineqarsimavo, Mikael Kúnak Kristensenili Ajaana Olsvigilu immikkut sulissuteqarsimapput.

Facebookimi qupperneq ”Hjælp de hjemløse i Nuuk” aqqutigalugu angerlarsimaffeqanngitsorpassuarnut atisanik, kamippannik allanillu maanna katersuiniarput.

- Louis qanoq atugaqarnersoq takullugu soorunami attortinnarpoq, Mikael Kúnak, 2007-imi nammineerluni angerlarsimaffeqanngitsuusimasoq taama oqarpoq.

Aamma atuaruk Angerlarsimaffeqanngitsunik ikiuisut

- Taanami opgangini unnuisarpunga, taamaammat nammineerlunga iliuuseqarniarlunga ippassaq (aaqq., pingasunngorneq) aalajangerpunga, Mikael Kúnak oqarpoq.

Allat ikiortariaqarnerupput
Louis Hansen suli tupermi najugaqarpoq, oqaluttuarineqarnermili inunnik taama amerlatigisunik attuisimanera assut tuppallarnartippaa.

- Taama amerlatigisut ikiuukkusunnerat tupaallaatigaara.

- Nuannerpoq inuit ikiuukkusunnerat, nalunnginnakkumi angerlarsimaffeeqanngitsut ilaat atisat atukkatik kisiisa pigigaat, Louis Hansen oqarpoq.

Facebookimi quppernermi Hjælp de hjemløse i Nuuk ikiortarialinnik ikiueqataanissannut periarfissaqarputit.