Angerlarsimaffeqanngitsunut nerlerit 45 kiilut
Peqataasussat 80-t missaaniittut naatsorsuutigineqarput, ukioq manna Atuarfik Samuel Kleinschmidt ukiut tallimassaa angerlarsimaffeqanngitsut juullisioqatigiinnissaannut, juulliaqqami decemberip 24-ni atorneqalerpat.
Angerlarsimaffeqanngitsunut juullisioqatigiissitsisarneq maanna ileqquulersimasoq, nalunaaquttap akunnerinik sisamanik sivisussuseqassaaq, tassa ullup qeqqaniit aallartilluni, ualikkut nalunaaqutaq sisamap tungaanut. Nerinerup nalaani aliikkusersuisoqarnissaa kingumut naatsorsuutigineqarpoq, tassa Nuuk by orkester, erinarsoqatigiit Qissiat aamma N.A.I.P peqataaniarlutik nalunaarsimammata.
Naak ukiut tamaasa juullerpalaartitsisoqartarneranut peqataasartut amerliartoraluartut, taamaannera nuannaarutissaavallaanngilaq.
- Misigisimavunga ukiut tamaasa nereqatigiinnermi peqataasartut amerliartuinnartut, taassuma ersersippaa pissutsit nuannerpallaanngitsut atorneqalersimasut, aaqqissuisuniit Inger Berglund Kleist knr.gl-mut oqarpoq.
Erseqqissaatigaa ukiut tallimat matuma siorna aallarteqqaaramik qanoq misigisaqarnerminnik. Taamanikkut Nuuk Kommuniusimasoq suaarutiginnimmat Nuummi angerlarsimaffeqanngitsunik takussaasoqanngitsoq.
- Politikkerit eqqummaariffiginerusariaqarpaat ajornartorsiutip inissisimanera, taamaattumik politikkerit eqqaasinneqartuartariaqarput angerlarsimaffeqanngitsut inissisimanerat pillugu, Inger Berglund Kleist oqarpoq.
Inger Berglund Kleist nammineq ukiut tallimat matuma siorna, angerlarsimaffeqanngitsunut aaqqissuussinerit aallarteqqaarmatali peqataasalerpoq. Oqaatigaa suleqataarusunnini perorsagaanermik aallaaveqannguatsiartoq oqaanneqartarsimagami inoqatit ikiorneqartarnissaasa pingaassusaanik, misigissutsillu akuusarnerat eqqaalluguttaaq.
Angerlarsimaffeqanngitsut juullerpalaartinneqartarnerannut, Nuummi suliffeqarfiit namminersortut tunissuteqartarput, angerlarsimaffeqanngitsut atisanik oqortunik tunineqartarmata. Ukioq manna taamatut pisoqarnissaa naatsorsuutigaat. Ukiuni siuliinisut Juullip inuaniit pulaarneqarnissaq naatsorsuutigineqanngilaq. Ingerlatsineq akeqanngitsumik ingerlataasarnera peqqutaalluni.
