Angerlarsimaannarnissamik peqqussummik unioqqutitsisut sisamat politiit misissoraat
Inuit angerlarsimaannarnissamik peqqussutinik unioqqutitsisut pillugit politiit ulluni makkunani nalunaarfigineqaqattaarput.
- Suliat sisamat sapaatit-akunnerata massuma ingerlanerani suliarivagut, nalunaarutiginninnerillu marluk ippassaq tiguagut massakkullu suliaralutigit. Immaqa amerlanngillat, taassuma saniatigut sianerfigineqartarpugut, nalunaarutiginninnerillu taakku nalilersortarpagut, qisuariaateqassanerluta, Brian Thomsen, Kalaallit Nunaanni Politiit pigaartuineersoq oqarpoq.
Angerlarsimaannarnissamut malittarisassat
- Nunatsinnut tikikkuit ulluni tallimani angerlarsimaannassaatit.
- Ullut tallimassaanni misissorteqqissaatit.
- Angerlarsimaannarnerup nalaani pisuttuarsinnaavutit, najugaqatigisatit attavigisinnaavatit aamma ulluinnarni atortussanik pisiniarsinnaatitaallutit.
- Pisiniarnissannulli anersaartuutinut illersuummi kiinnamulluunniit assersuummik atugaqassaatit.
- Allanut pulaassanngilatit, pulaartoqassanngilatit, aaqqissuussinernut peqataassanngilatit, bussissanngilatit, taxassanngilatit suliartussanallu.
- Ullut tallimassaanni misissorteqqinnianngikkuit tikinninniit ullut 14-it angerlarsimaannassaatit.
Politiit tamanna pillugu ulapinnerusut, taassuma oqaatigaa:
- Angerlarsimaannarnissamik peqqussummik unioqqutitsisimasoqassappat inuk ataasiinnaanngitsoq pissarsiarissavarput. Tunillatsittoqarsimappat tunillatsittumut qanittumiissimasut ujartortariaqassavagut, tamannalu suliaavoq imaannaanngitsoq, Brian Thomsen oqarpoq, nangillunilu:
- Ulapittariaqassaagut, suliassami pinarsinnaasut allat aamma suliarisussaagatsigit, kinguaassiutitigut atornerluinerit, nakuuserniarnerit allallu taakkununnga ilaallutik. Taakku soorunami aamma misissuiffigisussaavagut, Kalaallit Nunaanni Politiit pigaartuineersoq oqarpoq.
AAMMA ATUARUK Politiit: Angerlarsimaannartussaatitaanerni niuertarfissioruit akiligassinneqassaatit
Angerlarsimaannarnissamik peqqussumik unioqqutitsisimasumut suliaq ataaseq Nuummi marlunnngormat pivoq, taannalu akiliisitaanermik kinguneqarluni. Inuk ataaseq nunatsinnut angalasuuvoq, Nuummullu tikinnermi ulloq taanna ingerlaannartumik pisiniarfilerisimalluni, inullu taanna 3500 koruuninik akiliisitaalluni.
