Angerlarsertarnertik qaangerpaat

"Sapinngilanga, pisinnaavunga". Qaasuitsup Kommuniani inuusuttut suli 18-iliisimanngitsut, inuunerminnilu unittooqqasutut misigisimasut ingerlariaqqissinnaanissaat pillugu suliniut taama qulequtserneqarsimavoq, suliniummillu aqutsisut Nuummi sapaatip-akunnerata naanerani isumasioqatigiissinneqaqqammerlutik.

Allattoq Mads Lynge

novembarip 18-at 2013 13:52

- Qaasuitsup Kommuniani inuusuttorpassuarnik massakkut uninngaannartunik peqarpugut, iliuuseqarfiginngikkutsigullu aammalu inuiaqatigiit akornatsinni massakkut praktikkerfissaaleqineq allatigullu ilinniarfinnik peqarnissarput amigaatigisorujussuarput. Inuusuttortavut nukissaannik tunioranngikkutsigit unittooraluttuinnarnissaat aamma pakkersimaarniarlugu arlaatigut suliniuteqartariaqarpugut

Bea Mølgaard Lennert, Qaasuitsup Kommuniani Piareersarfinni, suliffissarsiuussisarfiullu immikkoortortaani pisortaq taama oqarpoq.

Inuusuttut katillugit 20-t suliniummut qaammatinik pingasunik sivisussusilimmi peqataapput, Qaanaaminngaanneersut Niaqornaarsuk tikillugu suliniummi Qeqertarsuarmi ingerlanneqartumi peqataallutik.

Inuusuttut annikikkaluamik atuagarsortinneqartarput, atuarnermiilli allaanerusumik aamma misigisaqartinneqartarlutik:

- Timersorneq, piniarneq, pisunneq, illulerineq allallu tamakkua inuunerup naliginnaasumik ingerlanneqarnissaannik siunertaqartut misileraallutillu ingerlappaat namminneerlutik, Bea Mølgaard Lennert oqarpoq.

Inuusuttut Qaasuitsup Kommunianeersut angerlarsimaffitsik, nunaqqatitillu qimallugit Qeqertarsuarmi ataatsimoortinneqarput, ilaallu soorunami angerlarsertarsimallutik, Bea Mølgaard Lennert oqarpoq, inuusuttullu imminnut ilikkariartuaarnerat ilutigalugu angerlarsertarnerat annikilliartuaarsimalluni.

Angajoqqaalli matumani inissisimanerat ilaatigut aamma ajornartorsiutaasimasoq, Bea Mølgaard Lennertip oqaatigaa, angajoqqaat meerartik angerlarsilersoq pillugu ilaatigut nakkaannajavallaarsimanerat tikkuarlugu. Angajoqqaalli attaveqarfiginerisigut, suleqatigalugillu iliuuseqartoqarneratigut inuusuttut iluatsittumik Qeqertarsuarmiitinneqarsinnaasimapput:

- Angajoqqaat aamma kaammattorusunnarput iliuuseqartarnissaat. Aajuku neriffissagut, aajuku ullormut suliassavut, aajuna ullaakkut itertartussaavugut. Tamakkua killit meerartatta pisariaqartippaat. Uku inuusuttuaqqat 20-t tamanna takutippaat, Bea Mølgaard Lennert, Qaasuitsup Kommuniani Piareersarfinni, suliffissarsiuussisarfiullu immikkoortortaani pisortaq taama oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.