Asseq atuakkamit.Assi: Inuuteq Storch

Angerlarserneq atuaganngortoq

Angerlarsimaffik qimallugu ilinniariarneq artornarsinnaasarpoq. Inuuteq Storchip nunatsinnut kipisanini atorluarpaa, tassami New Yorkimi ilinniartuunera pillugu atuagaq saqqummilerpoq.

Sungiusimasat qimallugit angalaneq, nunatta pinngortitarsuanut angerlarserneq misilittagaqarusunnerlu aqqutissiuussisoralugit atuagaq saqqummilerpoq. Taannalu atuagaq "Flesh"-imik taaguutilik juunimi saqqummissaaq. 

Inuuteq Storch New Yorkimi 2015-imi ilinniartuusimasoq atuakkamik saqqummersitisisuuvoq:

- Inuit nutaat, nerisassat nutaat illoqarfissuaq nunarsuarmi tusaamasaasoq. Piumassuseqarnarami assut, Inuuteq Storch oqarpoq. 

Atuagaq assilissanik taallanillu imaqassaaq, najugarisarlu qimallugu ilinniariarnermi misigissutsit qaffakaasartut, soorlu angerlarserneq maqaasinerlu tunngavigalugit atuagaq saqqummissalluni.

Nalunngiliuk?
Ateq: Inuuteq Storch
Ukiut: 30-t
Saqqummersitat allat: Atuagaq "Porcelain Souls", kalaallit inooriaasaannut ilaatigut tunngasumik saqqummersitaq. Atuakkami Inuuteq Storchip angajoqqaami assilisimasai angajoqqaavisalu allagaataat atorpai.
 

- Assit tunngavigisaat misigissutsit marluk ataatsimoortilernerat tassaasut tarninni angerlarsimasutut misigineq taavalu timinni Kalaallit Nunaata nunataa maqaasinera.

Kinaassutsip naninera

Inuuteq Storch New Yorkimi assiliisartut ilinniarfigisartagaanni "International Center of Photography"-mi ilinniartuusimavoq. Illoqarfillu kinaassutsip naniniarneranut iluaqutaangaatsiarsimasoq, Inuuteq Storchip oqaatigaa. 

Taassuma ilisimaneqaatigaa assiliinerup silarsuaani inatsisinik unioqqutitsilaarluni assileeriaaseqarnini, soorlu nalinginnaasumit allaanerusumik eqqarsartariaaseqarluni assiliisariaaseqarnini.

Atuakkami assit ilai uani takukkit:

 

 

 

 

 

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl