Angerlamut namminneq akiliisalernissartik itigartitsissutigaat

Namminersornerullutik OqartussatIsumaqatigiinniartarfiata Ilinniagartuut Kattuffiannut nalunaarutigaa, avataanit imaluunnit illoqarfimmit allamit tikisillugit suliartortitat pisortat inaataanni najugallit namminerisaminnik illusissagaluarunik imaluunnit piginneqatigiilluni illuutileqatigiinnut ilanngussagaluarunik siunissami angerlalerunik namminneerlutik akilikkaminnik angerlartalissasut.

Tamannalu isumaqatigiissutiniinngimmat akuerisinnaanngilluinnarlugu isumaqatigiissutinillu unioqqutitsinerusoq, Ilinniagartuut Kattuffiata siulittaasoq Jens Egede Bjarnholt isumaqarpoq.

- Tamanna akuerisinnaanngilluinnarput, taamaattoqassappallu kingunerlorujussuarsinnaavoq. Jens Egede Bjarnholt naliliivoq.

Jens Egede Bjarnholdt aamma isumaqarpoq, taamaattoqarsimassappat assigiinnaraa atorfinikkiartortussap angalanissani namminneerluni akilertalernissaa. Isumaqatigiinniartarfiup periutsinik allanngortitsiniarnera atorfilittat illusisimasut piginneqatigiilluniluunnit illuutileqatigiinnut ilanngussimasut akornanni nalornisitsilersinnaanera aamma erseqqissaatigaa.

- Angerlalernermi akiliunneqarnissaq naatsorsuutigalugu suliartorsimasut pisinnaatitaaffitik nalornissutigilersinnaavaat, neriuppungalu siunissami atorfinikkusussinnaasut piumassusaannut kingunerlussanngitsoq. Jens Egede Bjarnholdt oqarpoq, nangipporlu:

- Ilaasortatta saaffiginnissutaa ataaseq tunngavigalugu Isumaqatigiinniartarfiup isumaqatigiissutini oqaasertat isumaannik allanngortitsinialernerat periusaavoq aamma akuerisinnaanngisarput. Jens Egede Bjarnholdt erseqqissaavoq.

Aamma isumaqarpoq, taamaaliortoqassappat politikerinit akuerineqarsinnaanera inuiaqatigiillu taamaaliornissamut akissaqarsinnaanerat qularnartoq. Isumaqatigiinniartarfimmit oqaaseqartitsiniaraluaratta iluatsinngilarput.