Angel Mining tunisassiornerulerniarpoq
Maarmorilimmit Uummannap eqqaaniittumit zinkimik aqerlumillu Angel Miningip tunisassiornermi saniatigut calcium karbonatimik pappiaqqanut atorneqartartumik aamma tunisassiorniarpoq.
Tunisassiorniarnermili innaallagiaq pisariaqarpoq. Taamaammat suliffeqarfik aamarsuarnik Nuussuarmeersunik atuiniarpoq.
Aamarsuarnilli piiaaneq nunap iluaneersunit pissaaq, taamaammat mingutsiterissanngilaq, Angel Miningimi piiaanermi pisortap Tim Daffernip oqaatigaa.
- Innaallagissiorneq ima annertutigissaaq, allaat Uummannap illoqarfia nunaqarfiilu tamaasa innaallagissamik pilersorsinnaalerlugit, Tim Daffern neriorsuivoq.
Taamaalilluni Maarmoriliup ammarnerata saniatigut zinkimik aqerlumillu piiaasoqaannarani piiaavinnik allanik imminnut attuumassuteqartunik ukiut tallimat ingerlaneranni pilersitsisoqassaaq.
- Zinkimik aqerlumillu taamaallaat piiaanissaq akuersissutigineqarsimasoq, Aatsitassanut Ikummatissanullu Pisortaqarfiup pisortaa Jørn Skov Nielsen oqarpoq.
Qaasuitsulli Kommunianut Namminersorlutillu Oqartussanut pilersaarutit sinnerisa akuersissutigineqarnissaat qinnutiginiarlugu Tim Daffern oqarpoq, tamaanilu suliffiit 500-nit 600-nut amerlassusillit ukiuni tallimani tulliuttuni pilersinneqarnissaat taassuma naatsorsuutigaa.
- Kalaallit Nunaata suliffissuaqarfittut piorsarnissaanut peqataarusuppugut, taamaaliornermilu inuit inuuniarnermikkut atugaat pitsanngorsaavigalugit, Tim Daffern oqarpoq.
Ilanngutassiaq unnugu Qanorooq-mi takuuk.
