Angallatinik attartortoqarpoq

Disko Linep angallataataa, Najaaraq Ittuk sarpiiarmat sapaatip akunneri kingulliit marluk Qeqertarsuup tunuani angallateeqqat attartortarlugit takornarianik angallassisoqartariaqarsimavoq.

Najaaraq Ittuk juni naagaa sarpiiarpoq, taamalillunilu Sarpissaa nutaaq Danmarkimiit Nuummut nassiunneqarmat Najaaraq Ittuk 60-inik ilaasoqarsinnaasoq ilaatigut Nanuaqqamik 23-nik ilaasoqarsinnaasumik taarserneqarsimavoq.

Qeqertarsuup tunua junip naaneraniit takornariaqarnerpaajusarpoq, illoqarfiit nunaqarfiillu akornganni Najaaraq Ittuk sapaatip akunneranut sisamariarluni Arctic Umiaq Linemik sullissisartussaasimalluni.

Nunatta Angalatitsivianiit paasisagut malillugit sapaatit akunneranut sisamariarluni angalanerit tamarluinnarmik 60-it pallillugit ilaasoqartussaasimagaluartut taamaammallu sarpiiarnerup nalaani paasissutissanik ilisimatitsisarnerit sulisunit assut maqaasineqarsimanerangaapput.

Qeqertarsuarmi Destination Diskomi pisortaq, Linda Grønvold oqarpoq takornariat amerlasuut ippassaq aqqutissaarusimaartut Sarfaq Ittuup ataatsikkut aaneqarsimasut.

Nanuaqqami angalaniarnerit silarlunnera pissutigalugu kinguartoortarsimammata, Aasiaat Tourismip maluginiarnerarpaa. Qeqertarsuarmut Qasigiannguanullu aqqutissat amigaataaneri takornariat maqaasigaat maluginiarsimallugu, Arnannguaq Kristiansenip oqaatigaa.

Disko Linemiit, Klaus Andersen oqarpoq, Najaaraq Ittuup sarpiiarnerata nalaani angalasussat apuunniarneri assut ulapputigisimallugit, namminnerlu naliliinertik malillugu angallatinik attartornikkut Nanuaqqallu arlaleriarluni uteqattaartarneratigut isumagisassaminnik isumaginnilluarsimallutik.

Klaus Andersenillu Najaaraq Ittuk massakkut Nuummiit Ilulissanut ingerlaarnerarpaa, taamasillunilu sapaatip akunnerani marlunni angalaniarnerit erloqinartumik ingerlasimanerat aaqqingajalernerarlugu.