Angallat radariiaqqalluni ilaasunik angallassisoq
Disko Line-p ilaasunik angallassissutaa, Amaroq, sumiissusersiornermut pitsaasunik atortorissaaruteqanngitsoq, ilaasut Qeqertarsuarmiit kingusinnerusukkullu Aasianniit ikisut malugaat. Tassami Amaroq Aasiaat kangianni Akunnaap avannaatunganut pisorlu, aquttoq nunamik ilisarsiniarpasilluni pissusilerpoq. Taamaalinerani sila tarrajussiartulerpoq nittaallerlunilu.
Tassalu aquttoq tammartajaartoq paasinarsivoq, tammartajaarfimminiillu anillanniartilluni ikkarluppassuit aqqusaarpai:
- Avammukanneq aallaleruttorluta tassanngaannavissuaq ikkarlorujussuit sanioqqualeratsigit, qernariinnarsuit umiatsiaq attunngisuaannarlugu sanioqquteerarpagut. Tassani malunnartumik aquttorisarput tupattorujussuuvoq. Aqquterput qininnginnamiuk. Imaq isiginnginnamiuk. Qaqqat nuui sumiissusersiniarsaraluni ilisariniarsarigaluaramigit, taama Diskolinep angallataanut Amarormut ippassaq ilaasut ilaat Johnny Poulsen oqarpoq.
Amaroq marlunnik inuttaqarluni qulinillu ilaasoqarluni ippassaq angallassivoq. Disko Line-llu pisortaata nassuerutigaa angallatip naalagaata angallat radariiaqqasoq aallannginnermini nalusimanngikkaluaraa:
- Nalunngikkaluarpaa ajortoq. Kisianni naatsorsuutigisimagaluarpaa qaamanerani apuussinnaassalluni. Kisianni aqqutaani mallialussimanermut. Soorlu Akunnaap Qasigiannguillu akornanni sivisunerusumik ingerlaartariaqarsimalluni. Taava Qasigiannguit avannaqqutilaarlugit nunap killingatigut sajungami Ilimanallu kujatinnguanut pilluni nittaattumut silalu taarsilluni pulasimavoq, Disko Line-p pisortaa Frederik Sandgreen oqarpoq.
Disko Line-miilli isumaqarput silap qaamanerani angalanermi radareqanngikkaluarluni ilaasunik angallassisoqarsinnaasoq:
Pissusissamisoorpata taamannak radari ajortoq inunnut angallassissutigalugu?
-Ullukkut ingerlangaanni uanga isumaqarpunga - imaaliallaannaq aamma aaqqinneqarsinnaannginnami ilaa, angallallu aamma apuuttussaalluni imaattorfimminut - ullukkut qaamasukkut apuuffissaminut apuussinnaaguni uanga isumaqarpunga ajunngikkaluartoq, Frederik Sandgreen oqarpoq.
