Angallat qaleralinniut kalinneqartilluni kivisoq
Angallat sisaasoq isikkanillu 44-nik takissusilik Nuup kangerluani qaleralinniartilluni sisamanngornermi decembarip aallaqqaataata unnuaani nalunaarpoq, angallatip maskiinaqarfiata immalerneratigut angallat ingerlasinnaajunnaarluni Nuup kangerluani ajornartorsiortoq.
Sila pitsaavallaanngitsoq imarlu sarfaqisoq angallat ningittagarsorluni qaleralinniareerluni ajornartorsiulerpoq. Inuttat sisamaasut ningittakkersoreerlutik oqquiffissarsiorniarlutik aalajangerput. Angallallu kangerluup qinnguani sermeqarfiusumut pitunneqarpoq, tamaani sila atorsaasoq. Royal Greenlandip tusagassiuutinut nalunaarutaani ilaatigut taama allaqqavoq.
Kingunerileraa sermeq qupivoq angallallu sinerissap tungaanut tippugussaalluni siumigut nunamut aporpoq, kinguneranillu immalerluni.
Angallatit marluk ungasinngitsumiittut aggersarneqarput, ikiuigasuarnikkullu Kangilleq napparissarniarlugu pituutsersorneqarpoq. Kisianni Kangillermut pituutsiunneqarsimasut kittoraapput, angallallu ueruloornermigut immaqqilerluni.
Aqqartartut angallataat Mads Alex ikiuiartorluni unnuap qeqqata missaani annguppoq, kinguninngualu Kangilleq kalusiuteriarlugu Nuup tungaanut aallarluni.
Aqqutaani sila allanngoriataarmat qaleralinniut immaqqilerpoq ajornartorsioqqilerlunilu. Kalinneranili angallat annaassiniartitaasoq orsueruttoorpoq, qaleralinniullu immalluni oqimaalliartuinnarmat angallallu annaassiniartoq navianartorsiornerulinnginniassammat angallammut pituutarsuit killuinnarneqartariaqarlutik. Taassuma kingorna qaleralinniut Sermitsiap kangiani 350 meterit missaanni ititigisumi kivivoq.
Qaleralinniummi inuttat angallatip kivineranut tunngatillugu ullaap tungaani nassuiaatinneqareerunik Nuugaatsiamut angerlarumaartut Royal Greenlandimit ilisimatitsissutigineqarpoq.
