Angallat Los Angelesip eqqaani ikuallattoortoq
Tamatumunnga atatillugu inuit suli maqaasineqartut qulingiluaapput.
Angallat Los Angelesimi ataasinngornerup unnuaani ikuallattuulersimasoq Los Angelesip ungasinngisaani Santa Cruz Islandip eqqaani Californiap kujasinnerusuani inissisimasumi kivivoq.
Reuters naapertorlugu Santa Barbara Countymi sheriffiusup Bill Brownip ilisimatitsissutigisimavaa angallat ikuallattoormat inuit 40-t missaat angallammiissimassangatinneqarsimasut.
Angallat ikuallattoortoq 23 miiterisut takissuseqartoq The Conceptionimik ateqarpoq.
Angallat aqqartartunik Californiap avataanut Manerassuarmut Channel Islandimi nunap allanngutsaaliukkap eqqaaniittumut ulluni pingasuni aqqaqattaariartortussanik ilaasoqarsimavoq.
Angallammi ilaasuni amerlasuut angallatip ikuallattoornerani angallatip aquaniissimanerarneqarput.
Angallammili inuttat tallimat angallatip qaavaniissimammata immamut pississinnaasimapput.
Tamatuma kingorna immamit umiarsuarmi annanniummi inuttanit annaanneqarput.
Nutaarsiassaqartitsivik AP naapertorlugu sinerissami alapernaarsuisup Monica Rochesterip ilisimatitsissutigisimavaa annaassiniarneq Los Angelesimi marlunngornerup ullaavata tungaanut pisimasoq.