Angallat ikuallattoq kivivoq
Angallatip motoreqarfiani ikuallanneq amiilaarnartumik siuaruaappoq angallat nuannaariut ippassaq Upernaviarsuup eqqaani ikuallammat.
- Angutit inersimasut tallimat angallammiittut annanniut pullattagaq imaanut aqqarlugu pullatsikkasuarsimaavaat. Ulorianarluinnartumik pisoqarnerani eqqissisimasumik eqqarsarluarnertik annassutigaat. Inneq siuarualertorsimaqaaq kinguninngualu angallaammiittoqarsinnaajunnaarsimalluni, Qaqortumi politiit pisortaat Bent Ole Kleist KNR-mut oqarpoq.
Angutit tallimat annanniummiittut angallatip allap tikillugit ikisimavai.
Angallat ikuallattoq tassaavoq Windy 33. Politiit qatserisartullu iluallaffimmukarasuarput. Qaartoqarsinnaanera ulorianarsimavoq. Taamaammat arriitsuinnarmik qatserisartut angallat qanilliartorsimavaat nalunaaqutarlu 15.00 missaliuleraa qamillugu.
- Kisianni taava angallat tassanngannartumik kivivoq qatserisartut ikkivigissallugu piareersaleruttortut, Bent Ole Kleist oqaluttuarpoq.
