Angallat ikuallalermat Norgimi annaassiniarput
Angallat Norgimi Telemarkenimi qeqertap Krageø-p avataani ikuallammat annaassiniarneq annertooq ullaaq aallartippoq.
Aviisimi Politikenimi tamanna atuarneqarsinnaavoq.
Allattoq Mads Lynge
Angallat ungasissuliartaataavoq, ilaasorlu ataasituannguaq ikuallattumit annaanneqareerpoq.
Angallammit pujorsuaq malugineqarmat angallat alla umiarsuup ikuallattup qanittuaniittoq annaassiniartartunut kalerriisimavoq, umiarsuillu arlallit, sinerissamik alapernaarsuisut qulimiguulillu Seaking annaassiniariartorsimapput.
Umiarsuulli inuttaa umiatsiamut annanniuttut atorneqartartumut nammineerluni ikisinnaasimavoq, angallat ikuallattoq qimallugu, ajoqusersimanngitsorlu ilisimatitsissutigineqarpoq.
Angallammut allanik ilaasoqarsimanissaa ilimagineqanngitsoq, Politikenimi allaaserineqarpoq.