Angallat Danmarkimeersoq politiinit misissuiffigineqarpoq

Angallat marlunnik inuttaqarluni Nuup umiarsualivianut, ilungersunartumik imarpikkooreerluni ippassaq talippoq.

Sinerissamit nakkutilliissummit Einar Mikkelsenimit, tallimanngormat arfininngormallu ikiorserneqarpoq, kujataani sikorsuarnik ajornartorsiulernissaa ernummatigineqarmat.

Taamaalilluni sikorsuit anigorpai, angallalli Nuummut tikimmat ajornartorsiutai qaangiutinngillat.

Angallat tikimmat inuttai politiinit tikilluaqquneqarput ippassarlu angallat ulloq naallugu aqqartartut ikiorsiullugit misissuiffigineqarpoq.

Tamatuma kingorna politiit qinnuiginninnerisigut angallat nunamut qaqinneqarpoq, mannalu tikillugu suli angallat politiinit misissorneqarluni.

Angallat sooq misissuiffigeqqissaarneqarnersoq, Henrik Passip politimestereqarfimmeersup Radioavisimut oqaatigiumanngilaa.

- Tamanna pillugu massakkut oqaasissaqanngilanga, Henrik Pass aperineqarami akivoq, suliamullu atatillugu tigusarinnittoqarsimanersoq ilanngullugu oqaatigiumanagu. Taamaalilluni aanngajaarniutinik imaluunniit inatsisinik allanik unioqqutitsisoqarneranik peqquteqartumik angallammik misissuineq tunngaveqarnersoq paasissutissiissutigineqanngilaq.

- Sapaatip akunnerata tulliani oqaaseqarnissarput neriuutigaarput, ualeq manna politiit akissutigisinnaasatuaat taama nipeqarpoq.