Angallassineq timmisartuinnarmik ingerlanneqalissaaq

Qulimiguulimmik angalaneq akitsussaaq, nunaqarfinnilu nioqqutissanik pajuttuineq akuttorluni.

Naalakkersuisut ukiuni tulliuttuni tallimani angallasseriaaseq nutaaq ullumi saqqummiuppaat.

Naalakkersuisunut siulittaasup Hans Enoksen-ip angallannermut naalakkersuisutut ullumi tusagassiutinut katersuutsitsinermini nunatsinni nutaamik angallasseriaasissaq saqqummiuppaa.

-Inatsisartut piumasaqaataat 95 millioni koruuninik sipaarnissarput aallaavigalugu taanna aaqqipparput. Tassa aningaasat ilinniartitaanerup annertusarneqarnissaanut nuunneqartussaapput. Taamaalilluni annertunerpaamik nunami timmisartorneq ingerlanneqalissaaq, tapiissutit ataasiinnaanerusumut sammitinneqalissallutik, Hans Enoksen oqarpoq.

95 millioni koruuninik sipaarniarnerup kingunerivaa Air Alphap qulimiguulimmik timmisartuussisarnera unitsinneqarmat Arctic Umiaq Line-llu umiarsuaataanik angalaneq januaarip aallaqqaataaniit unittussanngormat.

Taamaalilluni nunatsinni timmisartuussineq Air Greenland-ip kisermaallugu ingerlatilissavaa. KNI Pilersuisullu immakkut angalaneq ingerlatilissavaa, siornatigut nunaqarfinni angalaneq kisiat ingerlatarigaluarlugu. Kiffartuussinermi isumaqatigiissutit aamma ukiunut pingasunut atuukkunnaarluni ukiuni tallimanut atuutinneqalerpoq.

Air Greenland-ip qulimiguulimmik timmisartuussineq kisimi ingerlatileruniuk angalaneq 10 procent-imik akitsussaaq.

Assersuutigalugu Upernavimmi angalaneq ullumi 490 koruuninik akilik, 539 koruunimut akitsussaaq.

Kujataanili timmisartorneq siunissaq ungasinnerusoq isigalugu 25-niit 30 procent-it tungaanut akikillissasoq naalakkersuisut naatsorsuutigaat, angalasut amerlinissaat ilimagineqarmat. Akilli aamma akitsoqqaassangatinneqarput.

Angallannermut isumaqatigiissutip nutaap aamma kingunerivaa, nunaqarfinnut nioqqutissanik pajuttuisarnerit allanngortinneqarmata. Siunissami sapaatit akunneri pingasut qaangiukkaangata aatsaat nioqqutissanik nunaqarfinnut pajuttoqartassaaq, sikoqannginneranili sapaatit akunneranut ataasiarluni pajuttuisoqartassalluni. Ullumikkut ullut qulikkaarlugit pajuttuisoqartarpoq.

Naalakkersuisut aamma pilersaarutigaat Paamiuni mittarfiliortoqarnissaa, taannali inatsisartuni suli akuerineqanngilaq.

Inatsisartuni aningaasaqarnermut ataatsimiititaliap angallannermi allannguutit tamarmik akuerivai. Isumaqatigiissutillu sapaatit akunnerini tullerni atsiorneqarnissaat naatsorsuutigineqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat