Angallannermi pilersaarusiorluarnissaq piumasaraat

Naalakkersuisut angallanneq pillugu siunissami aaqqissuussiniarneranni oqallinnermut ATASSUT maanna akuliuppoq. Atassut isumaqarpoq, Arctic Umiaq Line A/S-imut tapiissutigineqartartut unitsivinneqassappata, angalatitseqatigiiffillu matuneqassappat imaluunniit namminersortunngorsarneqassappat - tamanna torersumik illersorneqarsinnaasumillu naalakkersuisunit suliarineqartariaqartoq.

Atassummit aamma piumasarineqarpoq, namminersortunngorsaasinnaaneq pillugu immikkut ittumik ataatsimeersuartitsinissamut aqutsisut pisiariumannittussarsiornissamut pisinnaatinneqassasut.

Aamma qulakkeerneqaqquvoq, innuttaasut imaatigut angallannermut periarfissaasa sapinngisamik innarlerneqannginnissaat kiisalu ukiut aalajangersimasut iluini niuernerpalaartumik, pisortat aningaasatigut pituttorfiginngisaannik ingerlatsinissaq anguneqassasoq.

Københavnimi niuernermut qaffasinnerusumik ilinniarfimmi lektori, Atlantikup Avannaani aningaasarsiornermik ilisimatooq Lise Lyck Atassutip taamaalilluni illuatungilerpaa. Lise Lyck ungasinngitsukkut oqarpoq, umiarsuaatileqatigiiffiup namminersortup, nunatsinni piumasaqaatit immikkut ittut atorlugit angallassisarnissaa naapertuutinngitsoq.