Angallannermi ajornartorsiutit qaangerniarlugit oqalliffimmik pilersitsinissaq siunnersuutigaat
Nunatsinni angallassinikkut ulluni makkunani ajornartorsiortoqartoq tusartuarparput, piaarnerpaamillu aaqqiisoqartariaqartoq isornartorsiuisunit tusartuartarlutigu.
Avannaani takornariaqartitsinermik suliallit annersaasa ilaat Destination Disko isornartorsiuisunut ilaapput. Angallassinikkut aaqqitassaqaqisoq taakku oqariartuutigaat.
Destination Diskomi siunnersorti Konrad Seblon ima oqarpoq:
- Ilulissaniit Uummannamut umiarsuaqarneq ajornera ajornartorsiutaasoq assersuutigarput, qaqugulu aaqqiisoqarniartoq Uummannamiit apeqqutigineqartarpoq, Konrad Seblon oqarpoq, nangillunilu:
- Toqqaannartumilli akineqarneq ajoramik akissutissanik tunniussisinnaasunik ujartuivugut, taamaalilluta ajornartorsiut qaangersinnaassagaluaratsigu, Destination Diskomi siunnersorti oqarpoq.
Nunatsinni Takornariaqarnermi Inuussutissarsiornermilu Siunnersuisoqatigiit, GTE, aqqutigalugit aaqqiisoqarsinnaasoq Konrad Seblonip takorloorpaa.
- Air Greenlandip, Arctic Umiaq Line-p Royal Arctic Line-imillu peqataaffigineqartumi oqalliffimmik pilersitsisoqarsinnaanissaanik siunnersuuteqarpugut, hotelillu peqataasuugaluarpata apeqqutit akissutisineqassagaluarput, Destination Diskomi siunnersorti Konrad Seblon oqarpoq, nangipporlu:
- Uummannap sinersortaatinik timmisartunillu tikinneqanngittarnera sipaarutaavoq, Uummannamullu kingunerlulluni. Aporfiupput, suliffinnillu annaasaqaataaffiulluni, Konrad Seblon tunngavilersorpoq.
Inuit 10.400-ngajaat Qeqertarsuarmi eqqaanilu siorna takornariarsimapput.